بۇل كۇندەرى دۇنيە ءجۇزىنىڭ تۇكپىر-تۇكپىرىندە تەننيستەن ءىرى-ءىرى حالىقارالىق جارىستار ءوتىپ جاتقانى بەلگىلى. ءداستۇرلى تۋرنيرلەردە قازاقستاندىق تەننيسشىلەر دە بوي كورسەتىپ, باس جۇلدە ءۇشىن سىنعا ءتۇسۋ ۇستىندە.
قازاقستاننىڭ ءبىرىنشى راكەتكاسى الەكساندر بۋبليك قاتار استاناسى – دوحاداعى ATP 250 دوداسىن ءساتتى باستاعانىمەن, ەكىنشى اينالىمدا ەكپىنىن جوعالتىپ الدى. جەرلەسىمىز ءتۋرنيردىڭ جەكەلەي باسەكەسىندەگى العاشقى كەزدەسۋىن الەمدىك رەيتينگتە 183-ورىندا تۇرعان سلوۆاكيالىق يوزەف كوۆاليكپەن وتكىزىپ, ەكى سەتتە (6:2, 6:4 ەسەبىمەن) باسىم ءتۇستى. ي.كوۆاليك وسى ءتۋرنيردىڭ ىرىكتەۋ كەزەڭىندە تاعى ءبىر قازاقستاندىق اندرەي گولۋبەۆپەن كۇش سىناسىپ, وتانداسىمىزدى ەكى سەتتە (6:4, 7:6) جەڭىپ كەتكەن بولاتىن. وسىلايشا بۋبليك اندرەيدىڭ ەسەسىن قايتاردى دەسەك تە بولادى.
دەگەنمەن, جۋىردا عانا مونپەلەدەگى (فرانتسيا) ATP 250 تۋرنيرىندە توپ جارعان الەكساندر بۋبليك بۇل جولى الىسقا شابا المادى. ەكىنشى اينالىمدا رەيتينگتە وزىنەن 30 ورىن تومەن ورنالاسقان فرانتسيالىق ارتۋر ريندەركنەحپەن شەبەرلىك بايقاستى. تارتىستى وتكەن كەزدەسۋدىڭ العاشقى پارتياسىن 7:6 ەسەبىمەن جەرلەسىمىز ءوز پايداسىنا جازعانىمەن, كەيىنگى ەكى سەتتە ريندەركنەح بۋبليكتى بەت قاراتقان جوق. ەكىنشى سەتتە فرانتسيالىق تەننيسشى 6:1 ەسەبىمەن تارازى باسىن تەڭەستىرسە, شەشۋشى سەتتە 6:4 ەسەبىمەن جەڭىسكە جەتتى. ءسويتىپ ارتۋر ريندەركنەح جارىستىڭ شيرەك فينالىنا جولداما الدى.
ەندى الەكساندر بۋبليك وسى جارىستىڭ جۇپتىق باسەكەسىندەگى جورىعىن جالعاستىرادى. بۇل سىندا ول ماجارستاندىق مارتون فۋكوۆيچپەن بىرگە جۇپ قۇراپ, ءبىرىنشى اينالىمدا دوديگ-ۆينۋس جۇبىن 7:6, 6:3 ەسەبىمەن جەڭدى. بۋبليك پەن فۋكوۆيچ جۇبى ەكىنشى اينالىمدا اندرەي گولۋبەۆ پەن فرانتسيالىق فابريس مارتەنمەن وينايدى. بۇل باسەكەدە قاي جۇپ جەڭسە دە, قازاقستاندىقتاردىڭ بىرەۋى جالپى جۇلدە قورى 1 ملن اقش دوللارىنان اساتىن جارىستىڭ جارتىلاي فينالىنا شىعادى.
گولۋبەۆ-مارتەن باستاپقى ويىنىن ۇلىبريتانيالىقتار دەنيەل ەۆانس – كەن سكۋپسكيمەن وتكىزدى. قازاقستاندىق-فرانتسيالىق جۇپ ءبىرىنشى پارتيادا برەيك جاساپ, باسىم ءتۇستى – 6:4. ولار ەكىنشى سەتتە دە سول قارقىنىن جوعالتقان جوق – 6:4. ءبىر ساعاتتان ءسال استام ۋاقىتقا سوزىلعان كەزدەسۋدە ا.گولۋبەۆ پەن ف.مارتەن 3 ەيس جاساپ, 7 برەيكتىڭ ەكەۋىن ءوز ەسەپتەرىنە جازدى. قارسىلاستارى ءبىر عانا ەيس جاساپ, 4 برەيك-پوينتتى پايدالانا العان جوق.
سونىمەن قاتار تاعى ءبىر قازاقستاندىق تەننيسشى حالىقارالىق تۋرنيرگە قاتىسۋدا. الەكساندر نەدوۆەسوۆ فلوريدا شتاتىنىڭ دەلرەي-بيچ قالاسىندا ءوتىپ جاتقان ATP ءتۋرنيرىن ءساتتى باستادى. ول پاكىستاندىق ايسام-ۋل-حاك كۋرەشيمەن جۇپ قۇراپ, العاشقى اينالىمدا امەريكالىق بلۋمبەرگ-پول دۋەتىن ءۇش سەتتە (7:5, 6:7, 10:8 ەسەبىمەن) جەڭدى. ەندى نەدوۆەسوۆ پەن كۋرەشي شيرەك فينالدا اقش سپورتشىلارى – نيكولاس مونرو/دجەكسون ۋيتروۋمەن جارتىلاي فينالدىڭ جولداماسىن ساراپقا سالادى.