ەلىمىزگە تانىمال كينورەجيسەر, «قازاقفيلم» اق پرەزيدەنتى اقان ساتاەۆ باس قالادا وتكەن القالى وتىرىستا ءوزى باسقاراتىن كومپانيانىڭ جاعدايى ءماز ەمەس ەكەندىگىن ايتتى, دەپ حابارلايدى Egemen.kz «استانا» تەلەارناسىنا سىلتەمە جاساپ.
ء«بىز جۇمىس ىستەپ جاتىرمىز, بارىنشا تىرىسىپ باعامىز. بىراق ستۋديا تاپقان بارلىق قاراجات وكىنىشكە قاراي, قىزمەتكەرلەردىڭ جالاقىسى مەن اكىمشىلىك-شارۋاشىلىق قاجەتتىلىكتەرگە جۇمسالادى. شىندىعىن ايتقاندا, ءوز فيلمدەرىمىزدى شىعارۋعا دا قاراجات جەتكىلىكسىز. سوندىقتان, بىزگە ءوز فيلمدەرىمىزدى شىعارۋ ءۇشىن ءالى دە قولداۋ قاجەت», دەدى شاكەن ايمانوۆ اتىنداعى «قازاقفيلم» اق پرەزيدەنتى اقان ساتاەۆ.
باس قالادا وتكەن جينالىستا مادەنيەت سالاسىنداعى قۇلدىراپ تۇرعان ماسەلەلەر قوزعالدى. ماسەلەن, كىتاپ باسپاسى, مۇراعاتشىلاردىڭ جالاقىسى, مادەني نىسانداردى قايتا جوندەۋدەن وتكىزۋ جايىندا اڭگىمە قوزعالدى. جاۋاپتى مينيسترلىكتىڭ حابارلاۋىنشا, ەل ىشىندە 7 مىڭنان استام مادەني ورتالىق بار. الايدا ونىڭ كوبى ەسكى نىساندار. كىتاپحانالار مەن ارحيۆ ءىسى دە قولداۋعا ءزارۋ. سالا ماماندارى دا بىرقاتار كەمشىلىكتەردى ايتتى. ولار اۋىلداعى كادر تاپشىلىعى, قازاق تىلىندە جازىلعان كىتاپتاردى ساتۋ مەن باسپا ءىسىن دامىتۋدىڭ قاجەت ەكەنىن جەتكىزدى.
ايتىلعان ماسەلەلەردى تىڭداعان مادەنيەت جانە سپورت ءمينيسترى داۋرەن اباەۆ ولقىلىقتاردىڭ بىرتىندەپ شەشىلەتىنىن ايتتى.
ايانا توعانبەك
ەۇۋ ستۋدەنتى