سەناتتا ەلدىڭ سىرتقى مەملەكەتتىك قارىزدارىن ءتيىمدى پايدالانۋ ماسەلەلەرى تالقىلاندى, دەپ جازادى Egemen.kz.
دەپۋتاتتاردىڭ مەملەكەتتىك ورگاندار مەن كۆازيمەملەكەتتىك سەكتور وكىلدەرىمەن كەزدەسۋىن سەناتتىڭ قارجى جانە بيۋدجەت كوميتەتىنىڭ توراعاسى سەرىكباي ترۇموۆ جۇرگىزىپ وتىردى.
«قارجى مينيسترلىگىنىڭ مالىمەتى بويىنشا, 2022 جىلعى 1 قاڭتارداعى جاعداي بويىنشا قازاقستان رەسپۋبليكاسى ۇكىمەتىنىڭ سىرتقى قارىزىنىڭ كولەمى جانە كۆازيمەملەكەتتىك سەكتوردىڭ سىرتقى بورىشى 37,1 ملرد دوللاردى قۇرايدى, بۇل ۇلتتىق قور اكتيۆتەرىنىڭ 67 پايىزى, ياعني شەگىنە جاقىندادى. بارلىق دەرلىك مينيسترلىكتەردىڭ, سونداي-اق جەكەلەگەن جەرگىلىكتى اتقارۋشى ورگانداردىڭ جانە كۆازيمەملەكەتتىك سەكتوردىڭ سىرتقى نەسيەلەرى بار. سوندىقتان ولار ءۇشىن سىرتقى نەسيەلەردى جوسپارلاۋ مەن پايدالانۋدىڭ تيىمدىلىگى ماڭىزدى جانە شەشۋشى بولۋى كەرەك», دەدى سەرىكباي ترۇموۆ.
سەناتورلار بۇل اقشانى ءتيىمدى پايدالانۋدا سىرتقى قارىزدىڭ وسۋىنە جانە مەملەكەت قارجىسىن ءتيىمسىز پايدالانۋعا اكەلەتىن جۇيەلى پروبلەمالار بار دەپ سانايدى.
سەناتور سۇلتانبەك ماكەجانوۆ مەملەكەتتىك ورگاندار مەن اكىمدىكتەردىڭ جانە كۆازيمەملەكەتتىك سەكتوردىڭ كوپتەگەن جوبالارى بويىنشا قارىزدى يگەرۋ بويىنشا اقپارات جوق. بۇعان قوسا قارىزدى يگەرۋ مەرزىمى ۇزارتىلۋدا. سونداي-اق, جوبالاردى ىسكە اسىرۋدىڭ الەۋمەتتىك-ەكونوميكالىق تيىمدىلىگى تولىق اشىلماعانىن جانە مەملەكەتتىك ورگاندار تاراپىنان وسىنداي جوبالاردىڭ ىسكە اسۋىنا باقىلاۋ مەن مونيتورينگ ءالسىز ەكەنىن ايتتى.
كوميتەت توراعاسى كەزدەسۋ قورىتىندىسىندا بارلىق سالالىق مەكەمەلەر, ءبىرىنشى كەزەكتە ۇلتتىق ەكونوميكا جانە قارجى مينيسترلىكتەرى ايتىلعان ەسكەرتۋلەر مەن ۇسىنىستار بويىنشا جۇمىس ىستەۋى قاجەتتىگىن, سىرتقى قارىزداردى باسقارۋ مەن رەتتەۋدى جەتىلدىرۋ جۇمىستارىن جالعاستىرۋى ءتيىس ەكەنىن ايتتى.