تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين تسيفرلىق ماينينگتى ليتسەنزيالاۋ ەنگىزىلەتىنىن ايتتى, دەپ جازادى Egemen.kz.
«تسيفرلىق ماينينگ بويىنشا نەگىزگى شارالار 3 باعىت بويىنشا جۇرگىزىلەدى. «سۇر ماينەرلەر» بويىنشا, ەنەرگەتيكا مينيسترلىگى جانە قۇقىقتىق ورگانداردان قۇرىلعان موبيلدى توپتاردىڭ رەۆولۆەرلىك تەكسەرۋ جۇيەسى ەنگىزىلەدى. سونداي-اق ولاردى جۇيەلى تۇردە انىقتاۋ ءۇشىن ۇيىمداردىڭ ءتىزىمى جاسالىپ, تۇتىنىلاتىن ەلەكترەنەرگيانىڭ تاريحي دەرەكتەرى قۇرىلادى جانە سالىقتىق, كەدەندىك تەكسەرۋلەردىڭ ناقتى الگوريتمى قولدانىلادى», دەدى ول.
ودان بولەك, ۋاكىلەتتى ورگاندارمەن بىرلەسە وتىرىپ, ءىر ادرەستەرگە شەكتەۋ قويۋ ارقىلى سۇر ماينەرلەردىڭ ءىس-ارەكەتىنە تىيىم سالۋ تەتىكتەرى پىسىقتالادى.
«سونداي-اق ءتيىمدى شەشىمدەردىڭ ءبىرى – «سۇر ماينەرلەردىڭ» مۇلكىن تاركىلەۋ زاڭنامادا قاراستىرۋ ماسەلەسى تالقىلانادى. اتالعان شارالار ۇلتتىق قاۋىپسىزدىك كوميتەتى, ەنەرگەتيكا جانە قارجى مينيسترلىكتەرىمەن بىرلەسىپ قابىلدانادى. نارىقتى رەتتەۋ بويىنشا تسيفرلىق ماينينگتى ليتسەنزيالاۋ ەنگىزىلەدى. مۇندا نەگىزگى كريتەري - تەحنيكالىق تالاپتارعا سايكەس بولۋ, ياعني قاجەتتى جابدىقتاردىڭ, ءورت قاۋىپسىزدىگى بويىنشا ءتيىستى بولمەنىڭ جانە مىندەتتەمەلەردىڭ بولۋىن قاراستىرۋ», دەدى مينيستر.
سونداي-اق ارنايى ءتاريفتى ەنگىزۋ, ەلەكتر ەنەرگياسىن كۆوتالاۋ جۇيەسى نارىق مۇشەلەرى مەن جالپى مەملەكەت ءۇشىن اشىق جانە تۇسىنىكتى نارىق قاعيداتتارىن ورناتادى.
«حالىقارالىق تاجىريبەنى ەسكەرە وتىرىپ, سالىق سالۋدىڭ وڭتايلى جۇيەسى ايقىندالادى. سونداي-اق ESG تالاپتارىن ساقتاۋ تۇرعىسىنان «اق ماينەرلەرگە» قارسى مىندەتتەمەلەر قويىلادى. تسيفرلى اكتيۆتەر جونىندەگى زاڭ جوباسى ءبىر توپ ءماجىلىس دەپۋتاتتارىمەن باستاماشىلىق ەتىلگەن بولاتىن. بۇل ءىس-شارالار اتالعان زاڭ جوباسىنىڭ اياسىندا تالقىلانادى», دەدى باعدات مۋسين.
ودان بولەك, ەلىمىزدە حالىقارالىق ستاندارتتارعا سايكەس كەلەتىن كريپتويندۋستريا سالاسىن دامىتۋ ءۇشىن ەكوجۇيەنى قۇرۋ بويىنشا شارالار قابىلدانادى. اتاپ ايتقاندا, كريپتوبيرجالاردى قۇرۋ, كريپتوبيرجا قاتىسۋشىلارى ۇشىن بانكتىك قىزمەت كورسەتۋدى ىسكە قوسۋ جانە ماينينگتىك پۋلداردى قۇرۋ.
ءمينيستردىڭ ايتۋىنشا, بۇل شارالار نارىقتا ناقتى جانە ايقىن ەرەجەلەردى ورناتۋعا, ەلەكتر جەلىسىن شامادان تىس جۇكتەلۋىن بولدىرماۋدى جانە ماينينگتىك فەرمالاردىڭ كوپشىلىگىن «سۇر ايماقتان» شىعارۋعا وڭ اسەرىن تيگىزەدى.