ازامات ساتىبالدى رەكتور بولىپ تاعايىندالدى

بۇل تۋرالى قر ۇلتتىق مۋزەي ديرەكتورى ارىستانبەك مۇحامەدي ۇلى facebook پاراقشاسىندا جازدى.

«قۇرمەتتى دوستار, تانىمال كينو جانە تەاتر اكتەرى, تەلەجۇرگىزۋشى, قازاقستاننىڭ ەڭبەك سىڭىرگەن قايراتكەرى ازامات ساتىبالدىنى ت.ق. جۇرگەنوۆ اتىنداعى قازاق ۇلتتىق ونەر اكادەمياسىنىڭ رەكتورى بولىپ تاعايىندالۋىمەن شىن جۇرەكتەن قۇتتىقتايمىن!

ونەر ادامىنىڭ تاعدىرى ەرەكشە!

قالىڭ كورەرمەن قاۋىم ازاماتتى تەاتر جانە كينو ونەرىنىڭ دامۋىنا ولشەۋسىز ۇلەس قوسىپ جۇرگەن دارىنى ەرەكشە ونەر يەسى رەتىندە تانيدى.

ستيۆەن كينگتىڭ «تابىستى ادام مەن تالانتتى ادامنىڭ جالعىز ايىرماشىلىعى – ەرىنبەي ەڭبەك ەتۋىندە» دەگەن كەرەمەت ءسوزى بار.

بىلىكتىلىگى مەن ءبىلىمىن, ىسكەرلىگى مەن جىگەرىن ورايلى ۇشتاستىرا بىلگەن ازاماتتىڭ قازاق ونەرىنىڭ بولاشاقتاعى بەت-بەينەسىن قالىپتاستىراتىن ناعىز كاسىبي ماماندار دايىنداۋ باعىتىندا بارلىق قارىم-قابىلەتىن جۇمسايتىنىنا سەنىمىم مول.

ازامات ساتىبالدى ۇلىن جاۋاپتى قىزمەتكە تاعايىندالۋىمەن قۇتتىقتاي وتىرىپ, الداعى قىزمەتىنە سəتتىلىك جانە تابىس تىلەيمىن!», دەلىنگەن جازبادا.

ايتا كەتەيىك, ازامات ساتىبالدى سۇراپباەۆ 1977 جىلى جامبىل وبلىسى رىسقۇلوۆ اۋدانىندا دۇنيەگە كەلگەن.

كوپ بالالى وتباسىندا تۋعان. 1997 جىلى ت.جۇرگەنوۆ اتىنداعى ونەر اكادەمياسىنا وقۋعا قابىلداندى. 2000 جىلى ديپلومدىق جۇمىسىن قورعاۋعا قوستاناي وبلىستىق دراما تەاترىنا جىبەرىلدى.

ەڭبەك جولىن 2001 جىلى م.اۋەزوۆ اتىنداعى قازاق مەملەكەتتىك اكادەميالىق دراما تەاترىنان باستاعان. اكتەر 20 شاقتى فيلمدە ويناعان.