ارالاس جەكپە-جەك ۇيىمىنىڭ (UFC) اسا جەڭىل سالماعىندا ونەر كورسەتەتىن قازاقستاندىق سپورتشى سەرگەي موروزوۆ (17-6) UFC-دەگى ءۇشىنشى جەكپە-جەگىن وتكىزىپ, ەكىنشى رەت جەڭىلدى.
اقش-تىڭ حيۋستون قالاسىندا وتكەن UFC 271 تۋرنيرىندە وكتاگونعا شىققان جەرلەسىمىز برازيليالىق دۋگلاس سيلۆا دە اندرادەمەن (28-4-0-1) جۇدىرىقتاستى. جەكپە-جەكتىڭ ءبىرىنشى كەزەڭىندە سەرگەي موروزوۆ قارسىلاسىنا قاراعاندا باسىم بولدى. ءتىپتى برازيليالىقتى ءبىر مارتە ەسەڭگىرەتىپ تە الدى. الايدا ەكىنشى راۋندتىڭ باسىندا موروزوۆتىڭ ءوزى نوكداۋنعا ءتۇسىپ قالدى. كەيىننەن راۋند ورتاسىندا برازيليالىق سەرگەيدى كانۆاسقا قۇلاتىپ, قىلقىندىرۋ ادىسىمەن جەڭىپ كەتتى.
وسىلايشا, سيلۆا دە اندرادە قاتارىنان ەكىنشى جەڭىسىنە قول جەتكىزدى. ەندى ونىڭ ەسەبىندە ءتورت جەڭىلىس, التى جەڭىس بار. موروزوۆ بولسا, UFC-دە ەكىنشى رەت ساتسىزدىككە ۇشىرادى. ول بىلتىر رەسەيلىك ومار نۋرماگومەدوۆتەن (13-0) جەڭىلگەن ەدى.