ەۋروپا فۋتبول قاۋىمداستىقتارىنىڭ وداعى (ۋەفا) ءوزىنىڭ رەسمي ينتەرنەت باسىلىمىندا جۋىردا عانا نيدەرلاندتا مارەسىنە جەتكەن فۋتزالدان ەۋروپا چەمپيوناتىنىڭ شارتتى قۇراماسىن جاريالادى.
ۇزدىكتەر قاتارىندا قازاقستان قۇراماسىنىڭ ويىنشىسى دۋگلاس جۋنيور دا بار. سونداي-اق دۋگلاستان بولەك, بۇل تىزىمدە ۋكراينا قۇراماسىنىڭ قاقپاشىسى – كيريلل تسيپۋن, چەمپيوناتتىڭ ۇزدىك ويىنشىسى پورتۋگاليالىق زيكي, يسپانيالىق سەرحيو لوسانو جانە رەسەي قۇراماسىنىڭ كاپيتانى سەرگەي ابراموۆ بار.
قارت قۇرلىق بىرىنشىلىگىندە ناتيجەلى پاس بەرۋ بويىنشا ءبىرىنشى ورىن يەلەنگەن قازاقستاندىق دۋگلاس جۋنيور قاتارىنان ءۇشىنشى ەۋروسىنا (2016, 2018, 2022) قاتىسىپ, ءۇشىنشى مارتە چەمپيوناتتىڭ شارتتى قۇرامانىڭ تىزىمىنە ەنىپ وتىر. ال رەسەيلىك سەرگەي ابراموۆ ۇزدىكتەر تىزىمىنە ەكىنشى رەت قوسىلدى. ول العاش رەت 2016 جىلعى ەۋرونىڭ ۇزدىك بەستىگىنەن كورىنگەن ەدى.
ايتا كەتەيىك, فۋتزالدان قازاقستان قۇراماسى بيىلعى ەۋروپا چەمپيوناتىنىڭ شيرەك فينالىندا ۋكراينادان جەڭىلىپ, جارىستى اياقتادى. ال ۋكراينا فۋتزالشىلارى قولا جۇلدە ءۇشىن وتكەن ويىندا يسپانيا قۇراماسىنان جەڭىلىپ قالدى. فينالدا رەسەيدى 4:2 ەسەبىمەن ۇتقان پورتۋگاليا قاتارىنان ەكىنشى رەت ەۋروپانىڭ تەڭدەسسىز قۇراماسى اتاندى.