سەمەيدە ەر ادام ورتەنگەن ۇيدەن تۋىسىن قۇتقارىپ قالدى, دەپ حابارلايدى Egemen.kz.
شقو توتەنشە جاعدايلار دەپارتامەنتى ءباسپاسوز قىزمەتىنىڭ مالىمەتىنە سۇيەنسەك, سەمەي قالاسىندا جەكە تۇرعىن ۇيدە ءورت شىققان. قىزىل جالىن كىرەبەرىستىڭ اعاش قۇرىلىمدارىن, تەرەزە مەن ەسىك بلوگىن جانە جيھازدى شارپىدى.
«وقيعا ورنىنا ءورت سوندىرۋشىلەر كەلىپ جەتكەنگە دەيىن ءۇي يەسىنىڭ سول ماڭدا تۇراتىن تۋىسى اندرەي ماتۆەەۆ ءورتتى بايقاپ قالىپ كومەككە ۇمتىلعان. كوك تۇتىنگە ورانعان ۇيدەن 1954 جىلعى ەر ادام شىعا الماي قالدى. سول كەزدە اندرەي تەرەزەنى شاعىپ, ىشكە كىرگەن. ەدەندە جاتقان ءۇي يەسىن تاۋىپ, ونى سىرتقا الىپ شىقتى», دەلىنگەن اقپاراتتا.
زارداپ شەگۋشى جەدەل جاردەم دارىگەرلەرىنىڭ تەكسەرۋىنەن كەيىن ۇيدە قالدىرىلدى. كوپ ۇزاماي ءورت سوندىرۋشىلەر جالپى اۋدانى 15 شارشى مەترگە جەتكەن ءتىلسىز جاۋدى اۋىزدىقتادى.
الدىن الا مالىمەت بويىنشا وتتىڭ شىعۋ سەبەبى – ەلەكتر جابدىقتارىن ورناتۋ جانە پايدالانۋ كەزىندە قاۋىپسىزدىك تالاپتارىن ساقتاماۋ.