بۇگىن نۇر-سۇلتان حالىقارالىق اۋەجايىنا بەيجىڭدە ءوتىپ جاتقان قىسقى وليمپيادادا فريستايل-موگۋلدان ونەر كورسەتكەن قازاقستان ۇلتتىق قۇراماسى ۇشىپ كەلدى. سپورتشىلاردى مادەنيەت جانە سپورت مينيسترلىگىنىڭ وكىلدەرى مەن جانكۇيەرلەر قۇشاق جايا قارسى الدى, دەپ حابارلايدى Egemen.kz.
«سپورت - باق پەن باپ قاتار جۇرەتىن سالا. ءتورت جىلدا ءبىر كەلەتىن ءدۇبىرلى دودادا بار كۇشتەرىڭىزدى سالىپ, جىگەرلەرىڭىزدى كورسەتتىڭىزدەر. ءبىز سىزدەردى ءاردايىم قولداۋعا دايىنبىز. جارقىن جەڭىستەرىڭىز ءالى دە الدا ەكەندىگىنە سەنىمىمىز مول», دەدى قر مسم سپورت جانە دەنە شىنىقتىرۋ ىستەرى كوميتەتى توراعاسىنىڭ ورىنباسارى ايگۇل بەكتەنوۆا.
ەسكە سالا كەتسەك, وليمپيدا ويىندارىندا فريستايل-موگۋلدان ۇلتتىق قۇراما ساپىندا التى سپورتشى ەل نامىسىن قورعادى. ولاردىڭ قاتارىندا يۋليا گالىشەۆا مەن دميتري رەيحەرد فينالعا جولداما الىپ, يۋليا 11-ءشى, ال دميتري 8-ءشى ورىنعا يە بولدى.