جىل باسىنان بەرى ەلوردادا 6 مىڭعا جۋىق وقۋشىدان كوروناۆيرۋس انىقتالدى. بۇل تۋرالى نۇر-سۇلتان قالاسىنىڭ باس سانيتارلىق دارىگەرى سارحات بەيسەنوۆا ايتتى, دەپ حابارلايدى Egemen.kz.
«جىل باسىنان بەرى وقۋشىلار اراسىندا 5 929 جاعداي تىركەلدى. ونىڭ ىشىندە 365 بالا وففلاين, 3 346 بالا ونلاين وقۋ كەزىندە اۋىرىپ قالسا, 2 219 بالا دەمالىستا جۇرگەن كەزىندە كوروناۆيرۋسقا شالدىققان», دەدى سارحات بەيسەنوۆا ەلوردا اكىمدىگىندە ۇيىمداستىرىلعان بريفينگ بارىسىندا.
سونىمەن قاتار باس سانيتار دارىگەر 14 اقپاننان باستاپ ەلوردالىق بارلىق وقۋشى وففلاين فورماتتا وقيتىنىن اتاپ ءوتتى.
«مەكتەپ جاسىنداعى بالالار اراسىنداعى اۋرۋشاڭدىققا جانە ونىڭ جەڭىل ءارى ورتاشا دەڭگەيدە وتەتىندىگىنە ساراپتاما جاساي وتىرىپ, ۆەدومستۆوارالىق كومميسسيانىڭ شەشىمى نەگىزىندە قر باس مەملەكەتتىك سانيتار دارىگەرى وسى جىلدىڭ 9 اقپانىندا 14 اقپاننان باستاپ بارلىق سىنىپ وقۋشىلارىن وقۋدىڭ ءداستۇرلى فورماتىنا اۋىستىرۋ تۋرالى №8 قاۋلىسىن شىعاردى», دەدى ول.