شۆەتسيا كوروناۆيرۋس ينفەكتسياسىنىڭ تارالۋىنا بايلانىستى ەلدە ەنگىزىلگەن بارلىق شەكتەۋدى تولىق الىپ تاستادى, دەپ حابارلايدى Egemen.kz Reuters-كە سىلتەمە جاساپ.
شۆەتسيا ۇكىمەتى بارلىق شەكتەۋدى الىپ تاستايتىنىن جاريالادى جانە ەلدىڭ دەنساۋلىق ساقتاۋ جۇيەسىنە قىسىم جوعارى بولعانىنا قاراماستان, COVID-19 سىناماسىنىڭ كوپشىلىگىن توقتاتتى.
«بۇل پاندەميانى بىلەتىندىكتەن, اياقتالدى دەپ ايتار ەدىم. ول اياقتالعان جوق, بىراق بولىپ جاتقان شۇعىل وزگەرىستەر مەن شەكتەۋلەر تۇرعىسىنان قاراساق, اياقتالدى», دەدى دەنساۋلىق ساقتاۋ ءمينيسترى لەنا حاللەنگرەن.
ءمينيستردىڭ ايتۋىنشا, COVID-19 بۇدان بىلاي قوعام ءۇشىن قاۋىپتى اۋرۋ بولىپ سانالمايدى. شۆەتسيا ۇكىمەتى بۇل شەشىمدى ۆاكتسينانىڭ جوعارى دەڭگەيىمەن جانە اۋىر حالدەگى ادامداردى اۋرۋحاناعا جاتقىزۋ دەڭگەيى تومەندەۋىنە بايلانىستى ءتۇسىندىردى.
كەلەسى اپتادان باستاپ بارلار مەن مەيرامحانالاردىڭ كەشكى ساعات 11-دەن كەيىن اشىق بولۋىنا رۇقسات ەتىلەدى, قوناقتار سانى شەكتەلمەيدى. سونداي-اق, جابىق مەكەمەلەرگە بارۋعا, ۆاكتسينالاردى پايدالانۋعا شەكتەۋلەر الىپ تاستالدى.
ۋمەو ۋنيۆەرسيتەتىنىڭ ۆيرۋسولوگيا پروفەسسورى فرەدريك ەلگ COVID-19 بويىنشا بارلىق شەكتەۋدى الىپ تاستاۋعا قارسى بولدى. ول شۆەد اۋرۋحانالارى ءالى دە اۋىرتپالىقتى سەزىنەتىنىن ايتتى. COVID-كە شالدىققان 2 200-گە جۋىق ادام ستاتسيونارلىق ەمدەۋدى قاجەت ەتەدى, بۇل 2021 جىلدىڭ كوكتەمىندەگى ءۇشىنشى تولقىنمەن بىردەي.
ء«سال شىدامدى بولۋىمىز كەرەك, كەم دەگەندە تاعى ەكى اپتا كۇتۋىمىز كەرەك. تەستىلەۋدى جالعاستىرۋعا قاراجاتىمىز جەتەدى. بۇل اۋرۋ ءالى كۇنگە دەيىن قوعامعا ۇلكەن قيىندىق تۋدىرىپ وتىر», دەدى ول.
الايدا شۆەتسيانىڭ دەنساۋلىق ساقتاۋ اگەنتتىگى تەستىلەۋ تۇسكەن پايداعا قاراعاندا تىم قىمبات ەكەنىن ايتتى. شۆەتسيا جىلدىڭ العاشقى بەس اپتاسىندا تەستىلەۋگە 55 ميلليون شۆەد كروناسىن (55 ميلليون دوللار) جانە پاندەميا باستالعالى بەرى شامامەن 24 ميلليارد كرون جۇمساعان.
1 كۇن بۇرىن شۆەتسيادا 114 ادام قايتىس بولدى. بارلىعى 16 182 ادام COVID-19-دان قايتىس بولدى. جان باسىنا شاققانداعى ءولىم سانى سكانديناۆياعا قاراعاندا ەداۋىر جوعارى, بىراق كوپتەگەن ەۋروپا ەلدەرىنە قاراعاندا تومەن.