مۇقاعاليدىڭ تۋعان كۇنى الماتىداعى ماقاتاەۆ پەن جەلتوقسان كوشەسىنىڭ قيىلىسىنداعى اقىن ەسكەرتكىشىنىڭ الدىنا جينالعان جاستار الما-كەزەك جىر وقىدى, دەپ حابارلايدى Egemen.kz.
بۇل – بۇلجىماس داستۇرگە اينالعالى قاشان. ءبىر عاجابى, مۇنى ەشكىم ارنايى ۇيىمداستىرىپ جاتپايدى. جىرسۇيەر جۇرەكتەردى اقىنعا دەگەن اسقاق قۇرمەت, ماحاببات جەتەلەپ اكەلەدى مۇندا. قولايسىز اۋا رايىنا قاراماستان بيىل دا اقىن ەسكەرتكىشىنە جينالعاندار از بولعان جوق. پوەزيا پاديشاسىنىڭ ەسىمىن اسپەتتەگەندەر رۋحىنا تاعزىم ەتىپ, ەسكەرتكىشىنە گۇل شوقتارىن قويدى. جينالعاندار اراسىنان مەكتەپ وقۋشىلارىنان باستاپ قاز-قاز باسقان قاريالاردى دا كەزدەستىردىك. تەبىرەنە ولەڭ وقىپ, اقىن كۇندەلىكتەرىنەن سىر شەرتكەن مۇقاعالي ماقاتاەۆ اتىنداعى مەكتەپ-گيمنازيانىڭ شاكىرتتەرى دە وسى جەردەن تابىلدى.
ەسكەرتكىش الدىندا ءبىر شوق گۇل ۇستاعان وتىزدار شاماسىنداعى زامانداسىمىزدى اڭگىمەگە تارتتىم. قالا ىرگەسىندە تۇراتىن ەلنازار احمەتبەكتىڭ: «مۇقاعاليدىڭ تۋعان كۇنى مەن ءۇشىن ساعىنا كۇتەتىن مەرەكە سەكىلدى» دەگەنى كوڭىلىمىزدى تەربەپ ءوتتى. جۇك كولىگىن جۇرگىزەتىن قاراپايىم ازامات, ماماندىعى مۇلدە باسقا بولسا دا ولەڭ سۇيەتىنىن, اسىرەسە, مۇقاعالي جىرىن جاستانا وقيتىنىن جەتكىزدى.
– جىل سايىن اقپاننىڭ توعىزى كۇنى باسقا جۇمىستاردى ىسىرىپ, مۇقاعالي ەسكەرتكىشىنە كەلەمىن. جاستاردىڭ ولەڭ وقىعانىن تاماشالايمىن. مۇمكىندىگىم كەلسە كەڭسايداعى اقىن زيراتىنا بارىپ, قۇران باعىشتاۋدى دا وزىمە پارىز سانايمىن. بارا الماي قالعان كەزدەرىمدە, ءوزىمدى قولايسىز سەزىنىپ, اقىن الدىندا ۇياتتى بولعانداي بويىمدى ءبىر قىزىق سەزىم بيلەيدى, – دەيدى ەلنازار احمەتبەك.
ەسكەرتكىش جۇمىس كەڭسەمىزگە جاقىن ورنالاسقاندىقتان, كەلۋشىلەر لەگى قاس قارايعانشا ۇزىلمەيتىنىن بايقايمىز. توعىزىنشى اقپاندا مۇندا كەلگەن ۇلكەن-كىشىنى ميلليونداردىڭ جىر قۇبىلاسىنا اينالعان پوەزيا قۇدىرەتى قاۋىشتىرادى. جانە وسىلاردىڭ ىشىندە ەلنازار كەشكەن سەزىمدى باستان وتكەرەتىندەر از ەمەس ەكەنىن انىق سەزگەندەي بولامىز. كەنەت, اقىننىڭ «مەن ماڭگى ولمەيتىن شىعارمىن» دەگەن جولدارى ەرىكسىز ەسىمىزگە تۇسەدى.