مەملەكەت باسشىسىنىڭ توراعالىعىمەن ءوتىپ جاتقان ۇكىمەتتىڭ كەڭەيتىلگەن وتىرىسىندا ۇكىمەت باسشىسى ءاليحان سمايىلوۆ اتقارىلعان جۇمىستاردىڭ ناتيجەسىن باياندادى, دەپ جازادى Egemen.kz.
«وسى جىلدىڭ قاڭتار ايىندا بولعان قايعىلى وقيعالار ەلىمىزدىڭ الەۋمەتتىك-ەكونوميكالىق دامۋ جوسپارىنا تۇزەتۋلەر ەنگىزدى. الەۋمەتتىك-ەكونوميكالىق جانە قوعامدىق ساياسي جاعدايدى تۇراقتاندىرۋ ماقساتىندا وسى جىلدىڭ باسىنان باستاپ ۇكىمەتكە شۇعىل جانە جۇيەلى 108 تاپسىرما بەردىڭىز. بۇگىنگى كۇنى 44 تاپسىرما ورىندالدى. اتاپ ايتقاندا, الەۋمەتتىك-ەكونوميكالىق جاعدايدى تۇراقتاندىرۋ جونىندەگى جەدەل ءىس-قيمىل جوسپارىن ىسكە اسىرۋ شەڭبەرىندە ەلدىڭ بارلىق ايماعىندا قوعامدىق ءتارتىپ قالپىنا كەلتىرىلدى», دەپ ايتتى سمايىلوۆ.
پرەمەر-مينيستر اتاپ وتكەندەي, كوممۋنالدىق قىزمەتتەردىڭ باعالارى مەن تاريفتەرىنىڭ وسۋىنە جارتى جىلعا موراتوري ەنگىزىلدى. جانار-جاعارمايعا جانە گازعا شەكتى باعالار بەلگىلەندى.
«ۇكىمەت جانىنداعى وتاندىق كاسىپكەرلەر كەڭەسى قۇرىلدى. ۋتيليزاتسيالىق الىمدار مەملەكەتكە بەرىلدى. 100 پايىز مەملەكەتتىك «جاسىل دامۋ» اق جاۋاپتى وپەراتور بولىپ ايقىندالدى. «قازاقستان حالقىنا» قوعامدىق قورى قۇرىلدى جانە وعان بۇگىنگى كۇنى 115 ملرد تەڭگە قاراجات جينالدى», دەدى ۇكىمەت باسشىسى.
ودان بولەك, شاعىن جانە ورتا بيزنەسكە قاتىستى كارانتيندىك شارالار قايتا قارالىپ, جەڭىلدەتىلدى.