شايبالى حوككەيدەن ەلوردانىڭ «بارىسى» ونەر كورسەتەتىن قۇرلىقتىق حوككەي ليگاسىنىڭ (قحل) بيىلعى ماۋسىمى مەرزىمىنەن بۇرىن اياقتالدى. بەيجىڭدەگى وليمپيا ويىندارىنا بايلانىستى ۋاقىتشا توقتاتىلعان تۋرنير ودان ءارى جالعاسپايتىن بولدى. بۇل تۋرالى سەنبى كۇنى تۇراقتى بىرىنشىلىكتىڭ پرەزيدەنتى الەكسەي موروزوۆ مالىمدەدى.
– شايبالى حوككەي جانكۇيەرلەرى ءتورت جىلدان بەرى تاعاتسىزدانا كۇتكەن وليمپيا ويىندارىنداعى حوككەي باسەكەلەرىن تاماشالاۋدا. ال ءبىز وسى ءۇزىلىستى ءتيىمدى پايدالانىپ, قحل-دىڭ ماڭىزدى بولىگىن وتكىزۋگە دايىندالىپ جاتىرمىز. وزدەرىڭىزگە بەلگىلى, قاڭتار ايىندا كوپ كوماندا ويىنشىلارىنان كوروناۆيرۋس تابىلىپ, بىرقاتار ماتچتى كەيىنگە شەگەرىپ, ويىنداردى مەرزىمىنەن بۇرىن توقتاتۋعا ءماجبۇر بولعان ەدىك. بىرەر كۇن بۇرىن قحل-دىڭ ديرەكتورلار كەڭەسى رەسەي حوككەي فەدەراتسياسىنىڭ باسشىلىعىمەن كەلىسە وتىرىپ, تۇراقتى بىرىنشىلىك كوماندالارى مەن جانكۇيەرلەرىنە ىڭعايلى بولۋ ءۇشىن بيىلعى ماۋسىمدى مەرزىمىنەن بۇرىن اياقتاۋعا شەشىم قابىلدادى. ال ناۋرىز ايىنان باستاپ گاگارين كۋبوگى جولىنداعى پلەي-وفف باسەكەلەرى جالعاسادى.
قحل پرەزيدەنتى الەكسەي موروزوۆ تۇراقتى بىرىنشىلىكتىڭ مەرزىمىنەن بۇرىن اياقتالۋىنا بىرنەشە سەبەپ اسەر ەتكەنىن ايتادى. ارينە, ونىڭ ەڭ العاشقىسى ەكى جىلدان بەرى جالعاسىپ كەلە جاتقان كوروناۆيرۋس پاندەمياسى. چەمپيوناتتىڭ قالعان ماتچتارىندا دا ويىنشىلاردىڭ ىندەت جۇقتىرۋ قاۋپى بار ەكەنىن ەسكەرىپ, جارىستى توقتاتقان.
– گاگارين كۋبوگى باسەكەلەرى باستالعانعا دەيىن بارلىق كوماندانىڭ ويىنشىلارى ءوز كوماندالارىندا كارانتينگە جاتقىزىلادى. ال پلەي-وفف ويىندارى كۇنارا وتكىزىلەدى. ياعني جارىستىڭ العاشقى كۇنى «باتىس» جانە «شىعىس» كونفەرەنتسياسىنىڭ ەكى-ەكى كومانداسى, اراعا ءبىر كۇن سالىپ قالعان كلۋبتار مۇزايدىنعا شىعادى. اراداعى ءبىر كۇندىك دەمالىس ىندەتكە شالدىققان ويىنشىلاردىڭ ورنىنا باسقا حوككەيشىلەردى قوسۋعا مۇمكىندىك بەرەدى.
– ليگا تۇراقتى چەمپيوناتتىڭ ناتيجەلەرىن ەسكەرە وتىرىپ, پلەي-وففقا شىققان كوماندالاردى انىقتاۋ ماقساتىندا ءتۇرلى نۇسقالاردى قاراستىردى. بۇل جەردە ەڭ ماڭىزدىسى – كوپ ويىن وتكىزگەن جانە از ماتچقا قاتىسقان كوماندالارعا بىردەي مۇمكىندىك بەرۋ بولدى. ءسويتىپ سوڭىندا بارشاعا ورتاق ءبىر نۇسقاعا توقتالدىق. ياعني كوماندالاردىڭ جيناعان ۇپاي ساندارىنىڭ پايىزىنا قاراي ۇزدىك 16 كوماندانى انىقتاپ الدىق. بۇل ناتيجەلەردى بەكىتۋدىڭ تانىمال جانە الەمدىك دالەلدەنگەن تاجىريبەسى. مۇنى شەتەلدە دە, رەسەيدە دە قولدانادى.
تۇراقتى بىرىنشىلىك ويىندارى ۋاقىتشا توقتاعانعا دەيىن, ەلوردانىڭ «بارىسى» چەمپيوناتتىڭ «شىعىس» كونفەرەنتسياسىنداعى تۋرنير كەستەسىندە 8-ورىنعا تۇراقتاعان بولاتىن. جەرلەستەرىمىزدىڭ ەنشىسىندە 47 ماتچتان كەيىن 48 ۇپاي بار. «بارىس» وسى ناتيجەسىنىڭ ارقاسىندا پلەي-وفف كەزەڭىنە تىكەلەي جولداما الادى. قازاقستاندىق كوماندا گاگارين جولىنداعى كۋبوكتىڭ العاشقى ويىنىن «شىعىس» كونفەرەنتسياسىنداعى تۋرنير كەستەسىندە ءبىرىنشى ورىندا تۇرعان «مەتاللۋرگ» كومانداسىمەن كەزدەسەدى. ماتچ 1 ناۋرىز كۇنى ماگنيتوگورسكىدە وتەدى.
ايتا كەتەيىك, بەيجىڭدە ءوتىپ جاتقان قىسقى وليمپيا ويىندارىنىڭ حوككەي باسەكەلەرىندە قحل-دىڭ 22 كلۋبىندا ونەر كورسەتەتىن 120 حوككەيشى ءوز قۇرامالارىندا باق سىناپ جاتىر. رەسەي مەن قىتاي قۇرامالارىنىڭ تۇگەلى دەرلىك قحل ويىنشىلارىنان جاساقتالعان. ال لاتۆيا, چەحيا جانە فينليانديا كوماندالارىنىڭ جارتىسىنا جۋىعى قحل-دا وينايتىن حوككەيشىلەر.