قوس بەلدىك تە وزىمىزدە

جەرگىلىكتى Adal Promotions كومپا­نياسىنىڭ ۇيىمداستىرۋىمەن وتكەن اقتاۋداعى ءدۇبىرلى دودادا جوعارىدا اتاپ وتكەن بوكسشىلاردان بولەك, بىرقاتار جەرلەسىمىز وزدەرىنىڭ رەيتينگتىك كەزدەسۋلەرىن وتكىزدى. بوكس كەشىنىڭ شى­مىلدىعىن قازاقستاندىق بوكسشىلار جولداس جەڭىسوۆ (2-0, 1 كو) پەن ايدوس تاستاەۆ (1-2, 1 كو) اشتى. 4 راۋندتىڭ قورىتىندىسى بويىنشا ج.جەڭىسوۆ ۇپاي سانىمەن جەڭىسكە جەتتى. ەكىنشى جەكپە-جەكتە شارشى الاڭعا كوتەرىلگەن قازاقستاندىق مۇرات قىدىرالى (0-1) وزبەكستاندىق دەبيۋتانت بوگدان وتە­گەن­وۆتەن ۇپاي سانى بويىنشا جەڭىلىپ قالدى. ءتورت راۋندقا جوسپارلانعان ايقاستا تورەشىلەر جەڭىستى ءبىراۋىزدان وتەگەنوۆكە بەردى. ءۇشىنشى كەزدەسۋدە ەكى قازاقستاندىق بوكسشى يليا مەديانيك (2-0-1, 0 كو) پەن ارمان نۇراسىلوۆ (2-0, 1 كو) شارشى الاڭدا قولعاپ ءتۇيىستىردى. ەكىنشى ورتا سالماقتاعى كەزدەسۋدە تورە­شىلەر تەڭ ەسەپ تىركەدى – 58-56, 56-58, 57-57.

سونىمەن قاتار جۋىردا عانا ەلوردا تورىندە تاۋەلسىزدىك كۇنىنە وراي ۇيىم­داستىرىلعان بوكس كەشىندە ونەر كورسەتىپ, جەڭىسكە جەتكەن ورتا سالماق­تاعى ساپارباي ايداروۆ (7-0, 2 كو) بۇل جولى دا ءوز جانكۇيەرلەرىن قۋانتتى. التى راۋندقا جوسپارلانعان باسەكەدە ول رەسەيلىك داۆيد نيكولاەۆتان (9-9-1, 5 كو) تورەشىلەردىڭ شەشىمىمەن باسىم ءتۇستى.

ال اراعا بىرنەشە جىل سالىپ رينگ­تە بوي كورسەتكەن قازاقستاندىق بەكمان سويلىباەۆ (14-1, 4 كو) تا كورەر­مەندەردى جارقىن جەڭىسىمەن قۋانتتى. مەكسيكالىق ەليوت چاۆەسپەن (10-4-1, 6 كو) كەزدەسكەن ول سەگىزىنشى راۋندتا قارسىلاسىن نوكاۋتقا ءتۇسىرىپ, بوكس كەشى­نە جينالعاندارعا تاماشا كوڭىل كۇي سىيلادى. بۇل – وسى كەشتەگى جالعىز نوكاۋتپەن اياقتالعان كەزدەسۋ بولدى.

رەيتينگتىك كەزدەسۋلەر ءوز مارەسىنە جەتكەن سوڭ, كەزەك نەگىزگى جەكپە-جەكتەرگە كەلدى. اۋەسقويلار اراسىنداعى الەم چەمپيونى بەكزات نۇرداۋلەتوۆ كاسىپقوي رينگتەگى ءتورتىنشى كەزدەسۋىن 23 جاستاعى نيدەرلاند وكىلى چيكو كۋاسيمەن وتكىزدى. قارسىلاسى بۇگىنگە دەيىن شارشى الاڭدا التى جەكپە-جەك وتكىزىپ, سونىڭ بەسەۋىندە جەڭىسكە جەتكەن. ءبىر كەزدەسۋى تەڭ ەسەپپەن اياقتالعان تاجىريبەلى بوكسشى ەدى. 10 راۋندتىق فورماتتا WBO Youth بەلدىگى ساراپقا سالىنعان تارتىستى ايقاستا ب.نۇرداۋلەتوۆ تەحنيكالىق نوكاۋتپەن جەڭىسكە جەتىپ, كارەراسىنداعى العاشقى بەلدىگىنە قول جەتكىزدى.

ال وسى كەشتىڭ باستى جەكپە-جەگىندە جەرلەسىمىز مەيىرىم نۇرسۇلتانوۆ (16-0, 8 كو) پەن رەسەيلىك اندرەي سيروتكينمەن (19-1-1, 7 كو) ورتا سالماقتا بوس تۇرعان WBO International بەلدىگى ءۇشىن جۇدى­رىقتاستى. 36 جاستاعى رەسەيلىك اندرەي سيروتكين بۇعان دەيىن 21 مارتە شارشى الاڭعا كوتەرىلىپ, 19 رەت جەڭىسكە جەتكەن. جەتى باسەكەدە ايقىن باسىمدىق تانىتتى. ءبىر رەت ۇتىلىپ, تاعى ءبىر كەزدەسۋدە تەڭ ەسەپ تىركەلدى. وسىدان ءتورت جىل بۇرىن ول الەمنىڭ ەكس-چەمپيونى ريكاردو مايورگانى ۇتقان بولاتىن. 10 راۋندقا جوس­پارلانعان كەزدەسۋ ايقاستىڭ بەل ورتاسىندا مەرزىمىنەن بۇرىن مارەسىنە جەتتى. وتانداسىمىزدىڭ بەسىنشى راۋند­تاعى اۋىر سوققىلارىنان كەيىن سيروتكين جەكپە-جەكتى جالعاستىرۋدان باس تارتىپ, جەڭىلگەنىن مويىندادى. وسىلايشا, مەيىرىم نۇرسۇلتانوۆ WBO International بەلدىگىنىڭ يەگەرى اتاندى.

بۇل وتانداسىمىزدىڭ كاسىپقوي بوكستاعى 16-شى جەڭىسى. 2016 جىلدان بەرى كاسىپقوي رينگتە جۇدىرىقتاسىپ كەلە جاتقان مەيىرىم وسى ۋاقىت ارالىعىندا 15 مارتە شارشى الاڭعا كوتەرىلىپ, بار­لىعىندا جەڭىسكە جەتتى. سەگىز باسەكەنى مەرزىمىنەن بۇرىن اياقتاعان ەدى.