ءال-فارابي اتىنداعى قازاق ۇلتتىق ۋنيۆەرسيتەتىندە «جوو ۇزدىك وقىتۋشىسى-2021» بايقاۋىنىڭ جەڭىمپازدارىن ماراپاتتاۋ ءراسىمى ءوتتى. رەسپۋبليكالىق بايقاۋعا ەلىمىزدىڭ 76 جوعارى وقۋ ورنىنان 718 ۇمىتكەر قاتىسقان بولاتىن.
دوداعا ءتۇسىپ, جەڭىمپازدار قاتارىنان كورىنگەن 150 وقىتۋشى جىلدىڭ ۇزدىكتەرى اتاندى. سالتاناتتى شارادا ءبىلىم جانە عىلىم ءمينيسترى اسحات ايماعامبەتوۆ قۇتتىقتاۋ ءسوز سويلەپ, ۇزدىك وقىتۋشىلارعا جۇمىستارى ءۇشىن العىس ءبىلدىرىپ, تابىس تىلەدى.
«وسى ماڭىزدى بايقاۋدىڭ جەڭىمپازىن جاڭا تابىستارىمەن قۇتتىقتايمىن! بيىل كەلىپ تۇسكەن جۇمىستاردىڭ ساپاسى الدەقايدا جوعارى بولدى ءارى ورتاشا كورسەتكىش 15-20 بالعا ءوستى. بۇل وقىتۋشىلار قۇرامى مەن جالپى ءبىلىم بەرۋ ساپاسىنىڭ ءوسىپ كەلە جاتقانىن كورسەتەدى. ءبىلىم بەرۋ باعدارلامالارىن جاڭارتۋ بويىنشا دا جاقسى ديناميكا بار. ەلىمىزدە جاقسى ساپا كورسەتەتىن جوعارى وقۋ ورىندارى كوپ. ءبىز مۇنى ماقتان تۇتۋىمىز كەرەك. بۇگىندە مەملەكەت ءبىلىم بەرۋ ساپاسىن ارتتىرۋ, عىلىمدى قولداۋ بويىنشا جۇيەلى جۇمىس جۇرگىزۋدە», دەدى مينيستر.
وسى بايقاۋدا ءال-فارابي اتىنداعى قازۇۋ-نىڭ 25 وقىتۋشىسى وقۋ ورداسىنىڭ ءبىلىم بەرۋ جانە عىلىمي باعدارلامالارى مەن جوبالارىنىڭ جوعارى دەڭگەيىن دالەلدەپ, ۇزدىكتەر قاتارىنان كورىندى. ءبىلىم ورداسىنىڭ حيميا جانە حيميالىق تەحنولوگيالار فاكۋلتەتىنىڭ اعا وقىتۋشىسى ناسيبا بايماتوۆا قۋانىشتى ساتپەن بولىسە كەلىپ, «وقىتۋشى ءرولىن تالداي كەلە, قوعام الدىندا جاس ۇرپاقتى تاربيەلەۋدەگى جاۋاپكەرشىلىكتىڭ جوعارى ەكەنىن ۇعىناسىڭ. وسى ماماندىقتى تاڭداعاندا ستۋدەنتتەردى وقىتۋ عانا ەمەس, ءوزىڭدى دامىتۋ جانە جەتىلدىرۋ جۇمىسى تۇرعانىن ناقتى ءتۇسىندىم. «جوو ۇزدىك وقىتۋشىسى» سىيلىعى ءبىزدىڭ ماماندىعىمىزدىڭ ماڭىزىن كورسەتەدى جانە عىلىمي-پەداگوگيكالىق قىزمەتتى جان-جاقتى دامىتۋعا مۇمكىندىك بەرەدى», دەپ اتاپ ءوتتى.
ماراپاتتاۋ بارىسىندا جۇلدەگەرلەرگە ارنايى توسبەلگى تاپسىرىلىپ, ارقايسىسىنا 6 ملن تەڭگەدەن سىياقى بەرىلدى.
الماتى