قازاقستاننىڭ ءبىرىنشى, الەمنىڭ 35-راكەتكاسى الەكساندر بۋبليك فرانتسيانىڭ مونپەلە قالاسىندا ءوتىپ جاتقان ATP 250 ءتۋرنيرىن ءساتتى باستادى.
وسى جارىستىڭ 6-راكەتكاسى بولىپ تىركەلگەن ا.بۋبليك العاشقى كەزدەسۋىن الەمدىك رەيتينگتە 62-ورىندا تۇرعان نيدەرلاند وكىلى تاللون گريكسپۋرمەن وتكىزدى. اسا تارتىستى وتكەن باسەكەنىڭ تاعدىرى ەكى سەتتەگى تاي-برەيكتە شەشىلدى. شەشۋشى ساتتە مىقتىلىق تانىتقان قازاقستاندىق تەننيسشى 7:6 (7:4), 7:6 (7:5) ەسەبىمەن جەڭىسكە جەتتى. ەكى ساعاتقا جۋىق ۋاقىتقا سوزىلعان تارتىستى ماتچتا ا.بۋبليك 20 ەيس جاساپ, 9 برەيك-پوينتتىڭ بىرەۋىن عانا پايدالانا الدى. ا.بۋبليك ەكىنشى اينالىمدا الەمنىڭ 96-راكەتكاسى, گەرمانيالىق پەتەر گوەۆچيك نەمەسە رەيتينگتە 113-ساتىداعى فرانتسيالىق پەر-يۋگ ەربەردىڭ بىرىمەن كۇش سىناسادى.
ءبىر ايتا كەتەرلىگى, وسى ءتۋرنيردىڭ ىرىكتەۋ سايىستارىنىڭ فينالىندا قازاقستاندىق تەننيسشى ميحايل كۋكۋشكين ءدال وسى ەربەرگە ەسە جىبەرىپ, نەگىزگى دوداعا قوسىلا الماي قالعان بولاتىن.