قازاقستاندىق تەننيس تورەشىلەرى بيىل العاش رەت اۋستراليا اشىق چەمپيوناتىنىڭ جاسوسپىرىمدەر اراسىنداعى فينالدىق باسەكەسىندە قازىلىق ەتتى.
«ۇلكەن دۋلىعا» ساناتىنداعى ءىرى جارىستا مەرۋەرت كاۋكەەۆا مەن يۋليا يگناتچەنكو ءوز جۇمىستارىن ءمىنسىز اتقارىپ شىقتى. م.كاۋكەەۆا قىزدار اراسىندا جۇپتىق سىنداعى سوڭعى باسەكەگە تورەلىك ەتسە, يۋ.يگناتچەنكو بوزبالالار اراسىنداعى جەكەلەي سىندا قازىلىق جاسادى. مەرۋەرت پەن يۋليا 2020 جىلى ايەلدەر اراسىندا ەڭ بىلىكتى تورەشىلەر قاتارىندا WTA كومانداسىنا قوسىلدى. وتكەن جىلى توكيو وليمپياداسىنا, سونداي-اق اۋستراليا اشىق چەمپيوناتىنا, «رولان گارروس» جانە «ۋيمبلدون» سىندى ءۇش «ۇلكەن دۋلىعا» تۋرنيرىنە تورەشى رەتىندە قاتىستى.