مەملەكەت باسشىسى قاسىم-جومارت توقاەۆ 2025 جىلعا قاراي ەلىمىزدە بەدەلدى شەتەلدىك ۋنيۆەرسيتەتتەردىڭ كەم دەگەندە 5 فيليالىن اشۋ كەرەكتىگىن اتاپ وتكەنى بەگىلى. بۇل جاڭا زاماننىڭ زاڭدى تالابى ەكەنى داۋسىز.
ەلىمىزدەگى جوعارى اگرارلىق ءبىلىم بەرۋ ساپاسىن الەمدىك ستاندارتتارعا دەيىن كوتەرۋ, الەمدىك جەتەكشى ۋنيۆەرسيتەتتەردىڭ وزىق تاجىريبەسىن جيناقتاۋ جانە ەنگىزۋ, جاڭا ءبىلىم مەن تەحنولوگيالاردى ترانسفەرتتەۋ ماقساتىندا ۇزدىكسىز ىزدەنىستەگى قازۇازۋ باسقارما توراعاسى-رەكتور, قر ۇلتتىق اكادەمياسىنىڭ ۆيتسە-پرەزيدەنتى, اكادەميك تىلەكتەس ەسپولوۆ, «وسىعان وراي ۋنيۆەرسيتەت ءوزىنىڭ يننوۆاتسيالىق دامۋىندا اۋىل شارۋاشىلىعى ماماندىقتارى مەن ورمان رەسۋرستارى بويىنشا الەمدىك QS رەيتينگىندە كوشباسشى ۋنيۆەرسيتەت بولىپ تابىلاتىن ۆاگەنينگەن ۋنيۆەرسيتەتىنىڭ (نيدەرلاندى كورولدىگى) وزىق تاجىريبەسىن باسشىلىققا الاتىندىعى تۋرالى» اتاپ ءوتتى.
ۆاگەنينگەن عىلىمي-زەرتتەۋ ۋنيۆەرسيتەتىنىڭ (WUR) الەمدىك دەڭگەيدەگى ۋنيۆەرسيتەت رەتىندە قالىپتاسۋى مەن دامۋ تاجىريبەسى ۋنيۆەرسيتەتتىڭ 20 جىل بۇرىن قوسىلعان بەس عىلىمي-زەرتتەۋ ينستيتۋتتارىمەن ءساتتى ينتەگراتسيالانۋىنىمەن بايلانىستى بولىپ وتىر.
ۆاگەنينگەن ۋنيۆەرسيتەتىندە كاسىپورىنداردى, ۇكىمەتتىك جانە ۇكىمەتتىك ەمەس ۇيىمداردى, ۋنيۆەرسيتەتتى قامتيتىن Wageningen Metropolitan Food Clusters جەلىسى قۇرىلعان. بۇل جەلىگە قازۇازۋ دا قوسىلدى.
ۆاگەنينگەن ۋنيۆەرسيتەتىنە مەملەكەت تاراپىنان ۇلكەن قولداۋ كورسەتىلەدى, سونىڭ ناتيجەسىندە الەم بويىنشا بيزنەستى وزىنە تارتا الاتىن 20-دان استام اگرويننوۆاتسيالىق كلاستەر ازىرلەنىپ ەنگىزىلدى.
ۋنيۆەرسيتەت عالىمدارىنىڭ WURمەن 20 جىل بويى جۇيەلى جۇرگىزگەن بىرلەسكەن جۇمىسىنىڭ ناتيجەسىندە قازاقستان ۇكىمەتى دەلەگاتسياسىنىڭ نيدەرلاندى كورولدىگىنە ساپارى بارىسىندا «قازاق ۇلتتىق اگرارلىق ۋنيۆەرسيتەتى» كەاق جانە ۆاگەنينگەن ۋنيۆەرسيتەتى اراسىندا ءوزارا ىنتىماقتاستىق تۋرالى مەموراندۋمعا قول قويىلعان بولاتىن. ناتيجەسىندە قازۇازۋ بازاسىندا ۆاگەنينگەن ۋنيۆەرسيتەتىمەن جۇمىس ينستيتۋتى اشىلدى.
وسىلايشا قازۇازۋ ۆاگەنينگەن ۋنيۆەرسيتەتىنىڭ ءبىلىم بەرۋ باعدارلامالارىن ەنگىزۋ بويىنشا نانيان تەحنولوگيالىق ۋنيۆەرسيتەتىنەن (سينگاپۋر) كەيىن الەمدەگى ەكىنشى جوو بولدى.
WURعا ساپار اياسىندا تاراپتار قازۇازۋ بازاسىندا ۆاگەنينگەن ۋنيۆەرسيتەتىنىڭ ساراپشىلارىنىڭ كەڭەسىمەن قازاقستاندا سۇرانىسقا يە باعىتتار بويىنشا «ۆەتەريناريالىق تاعام ونىمدەرىنىڭ قاۋىپسىزدىگى جانە تەحنولوگياسى», «وسىمدىكتەر تۋرالى عىلىم مەن تەحنولوگيا» ەكى ءبىلىم بەرۋ باعدارلاماسىن اشۋعا كەلىسىم جاسالدى.
ءبىلىم بەرۋ باعدارلامالارىنىڭ ماقساتى جاڭا بۋىن كادرلارىن دايارلاۋ بولىپ تابىلادى. ازىرلەنگەن «ۆەتەريناريالىق تاعام ونىمدەرىنىڭ قاۋىپسىزدىگى جانە تەحنولوگياسى», «وسىمدىكتەر تۋرالى عىلىم مەن تەحنولوگيا» ءبىلىم بەرۋ باعدارلامالارى قر بعم ءبىلىم بەرۋ باعدارلامالارىنىڭ رەسمي تىزىلىمىنە ەنگىزىلگەن. بۇل ءبىلىم بەرۋ باعدارلامالارى گەرمانيانىڭ ACQUIN اگەنتتىگىندە حالىقارالىق اككرەديتاتسيادان ءوتتى جانە ولارعا حالىقارالىق اككرەديتتەۋ سەرتيفيكاتتارى بەرىلدى.
نيدەرلاندىق Dutch Fruit Solutions Kazakhstan (DFSK) كومپانياسىمەن بىرلەسىپ «اگروۋنيۆەرسيتەت» وقۋ-تاجىريبەلىك شارۋاشىلىعى بازاسىندا «قارقىندى باق» عىلىمي-زەرتتەۋ ورتالىعى, «اقىلدى جىلىجاي»» قۇرىلدى, وندا ستۋدەنتتەرگە اگروتەحنيكالىق, ۇيىمداستىرۋ-شارۋاشىلىق ءىس-شارالارىن وتكىزۋگە جانە عىلىمي-زەرتتەۋ جوبالاردى جۇزەگە اسىرۋعا, قورعاۋعا, سونداي-اق جەمىس-جيدەك ءوسىرۋ سالاسىنداعى زاماناۋي يننوۆاتسيالىق تەحنولوگيانى پراكتيكا جۇزىندە مەڭگەرۋگە تولىق مۇمكىندىكتەر جاسالعان.
بۇگىندە ينستيتۋتتا تەك قازاقستاندىق ەمەس, شەتەلدىك ستۋدەنتتەر دە ءبىلىم الۋدا. ستۋدەنتتەر اراسىندا بۇۇ دامۋ باعدارلاماسى اياسىندا وقۋعا تۇسكەن ستۋدەنتتەر دە بار.
وقۋدى اياقتاعاننان كەيىن تۇلەكتەر WUR قابىرعاسىندا ماگيستراتۋرانى جالعاستىرۋعا مۇمكىندىك بەرەتىن ۆاگەنينگەن ۋنيۆەرسيتەتىنىڭ سەرتيفيكاتى جانە قازۇازۋ ديپلومىن بىرگە الىپ شىعادى. مامانداردى دايىنداۋدىڭ مۇنداي فورماتى ەلدەن شىقپاي-اق اعىلشىن تىلىندە ساپالى جوعارى ءبىلىم الۋعا مۇمكىندىك بەرەدى.
سونىمەن قاتار ۋنيۆەرسيتەتتە حالىقارالىق اگروتەحنولوگيالىق حاب قۇرامىندا 11 عزي, 8 يننوۆاتسيالىق ورتالىق, 49 زەرتتەۋ زەرتحاناسى, 18 حالىقارالىق ورتالىق كىرەدى.
زەرتتەۋ باعىتتارى بويىنشا بارلىق توپتار قر اۋىل شارۋاشىلىعى مينيسترلىگى «ۇاعبو»كەاق بەيىندى عزي جانە اگروبيزنەس كاسىپورىندارىمەن ينتەگراتسيالانعان ورتاق جۇيەگە ەنگىزىلگەن.
جۇرگىزىلگەن جۇمىس ناتيجەلەرىنىڭ قورىتىندىسى بويىنشا 2020 جىلى وقۋ ورنى ۇكىمەت قاۋلىسىمەن زەرتتەۋ ۋنيۆەرسيتەتى مارتەبەسىنە يە بولدى. ال وتكەن جىلدىڭ قاراشا ايىندا ۋنيۆەرسيتەتتىڭ قاراماعىنا ءتورت بەيىندى عزي بەرىلىپ, بىرلەسكەن عىلىمي-زەرتتەۋ جوبالاردى جۇيەلى جۇرگىزۋگە, يننوۆاتسيالىق ءبىلىم بەرۋ باعدارلامالارىن ازىرلەۋگە جانە ناتيجەلەردى وندىرىسكە ەنگىزۋگە مۇمكىندىك بەردى.
الماتى