سەنات توراعاسىنىڭ ورىنباسارى اسقار شاكىروۆ ەقىۇ پارلامەنتتىك اسسامبلەياسى بيۋروسىنىڭ ونلاين-وتىرىسىنا قاتىستى, دەپ حابارلايدى Egemen.kz قر پارلامەنتى سەناتىنىڭ ءباسپاسوز قىزمەتىنە سىلتەمە جاساپ.
پارلامەنتاريلەر 24-25 اقپاندا وتەتىن پارلامەنتتىك اسسامبلەيانىڭ قىسقى وتىرىسىن وتكىزۋدىڭ فورماتى مەن شارتتارىن, سونداي-اق 2022 جىلى بولاتىن سايلاۋداعى بايقاۋ ميسسيالارىن تالقىلاپ, شەشىمدەر قابىلدادى.
وتىرىس شەڭبەرىندە وزەكتى حالىقارالىق ماسەلەلەر, سونىڭ ىشىندە قازاقستانداعى احۋال تالقىلاندى. ەقىۇ پا توراعاسىنىڭ ورىنباسارى اسقار شاكىروۆ ەلدەگى قاڭتارداعى قايعىلى وقيعالارعا بايلانىستى ءمان-جايدى ەگجەي-تەگجەيلى باياندادى. بيۋرو مۇشەلەرىن اتالعان وقيعالاردىڭ باعالانۋىمەن, سونداي-اق قازاقستان پارلامەنتىنىڭ تومەنگى پالاتاسىندا جانە وتاندىق بيزنەس وكىلدەرىنىڭ الدىندا سويلەگەن سوزدەرىندە پرەزيدەنت قاسىم-جومارت توقاەۆتىڭ الداعى كەزەڭگە ارنالعان الەۋمەتتىك-ەكونوميكالىق جانە قوعامدىق-ساياسي سالالارداعى ەلىمىزدىڭ نەگىزگى باسىمدىقتارىمەن تانىستىردى.
مەملەكەت باسشىسىنىڭ ازاماتتاردى, كونستيتۋتسيالىق قۇرىلىستى جانە ەگەمەندىكتى ءتيىمدى قورعاۋ ماقساتىندا ودان ءارى دەموكراتيالاندىرۋ, قوعامداعى الەۋمەتتىك ادىلەتتىلىكتى قالپىنا كەلتىرۋ, قۇقىق قورعاۋ ورگاندارىنىڭ جۇمىسىن قايتا فورماتتاۋ باعىتىنداعى ستراتەگيالىق رەفورمالارىنا ەرەكشە نازار اۋدارىلدى.
بيۋرو مۇشەلەرى اقپان ايىندا ەقىۇ پارلامەنتتىك اسسامبلەياسىنىڭ دەپۋتاتتارى ءۇشىن قازاقستانداعى وقيعالار بويىنشا ونلاين-بريفينگ وتكىزۋ تۋرالى ۇسىنىستى ماقۇلدادى. ەۋروپالىق دەپۋتاتتار ءوز كەزەگىندە قايعىلى وقيعالارعا بايلانىستى قازاقستانعا كوڭىل ايتىپ, قولداۋ ءبىلدىردى.
اسقار شاكىروۆ ەقىۇ پا وكىلدەرىن قازاقستانعا ساپارمەن كەلۋگە شاقىرىپ, ونىڭ بارىسىندا پارلامەنتشىلەر ەلدەگى جاعدايمەن تانىسىپ, ءتيىستى ماسەلەلەردى تالقىلاي الاتىنىن جەتكىزدى. بۇل ۇسىنىس قابىلدانىپ, پارلامەنتتىك اسسامبلەيا توراعاسىنىڭ ورىنباسارى, ورتالىق ازيا بويىنشا ارنايى وكىل پيا كاۋما قازاقستانعا ساپارمەن كەلۋگە نيەت ءبىلدىردى.