قىزىلوردا وبلىسىندا توتەنشە جاعداي رەجيمى كەزىندە قويىلعان 28 بلوكبەكەت جۇمىسىن توقتاتتى, دەپ حابارلايدى Egemen.kz.
توتەنشە جاعداي رەجيمى كەزىندە وڭىردە كومەندانتتىق ساعات پەن بىرقاتار شەكتەۋلەر ەنگىزىلگەن بولاتىن. كەزەكشىلىك جاساقتار كۇشەيتىلىپ, قارۋلانعان پوليتسيا قىزمەتكەرلەرى مەن اسكەريلەر تاۋلىك بويى قىزمەت اتقارعان 28 بلوكبەكەت قويىلدى. اتالعان ۋاقىتتا پوليتسياعا 952 ازامات جەتكىزىلدى.
توتەنشە جاعداي رەجيمىن بۇزعان 414 تۇلعا اكىمشىلىك جاۋاپكەرشىلىككە تارتىلدى, 253 قۇقىق بۇزۋشى اكىمشىلىك قاماۋعا الىنىپ, ولاردىڭ 73-ءى بوساتىلدى.
«قىلمىسقا كۇدىكتى رەتىندە تانىلعان 97 ادام ۋاقىتشا ۇستاۋ اباقتىسىنا قاماققا الىنسا, 12 كۇدىكتىگە قاتىستى قاماۋعا الۋعا بايلانىستى ەمەس بۇلتارتپاۋ شاراسى تاڭدالدى. ۇستالعانداردان 1 دانادان تەگىس ۇڭعىلى جانە تراۆماتيكالىق قارۋ, 13 دانا پىشاق, 9 قالقان, 4 كاسكا, 6 دۋلىعا, 1 برونەجيلەت جانە 1 كەلى 150 گرامم ەسىرتكى زاتتارى الىندى. مەديتسينالىق مەكەمەلەرگە 50 پوليتسيا قىزمەتكەرى جۇگىنىپ, ولاردىڭ 3-ءۋى جاتقىزىلدى», دەپ ءمالىم ەتتى قىزىلوردا وبلىستىق پوليتسيا دەپارتامەنتىنەن.
ۆەدومستۆو مالىمەتىنشە, قازىر بارلىق مەملەكەتتىك مەكەمە, تىرشىلىكتى قامتاماسىز ەتۋ نىساندارى, ەكىنشى دەڭگەيدەگى بانكتەر, تەمىرجول ۆوكزالى جانە اەروپورت شتاتتىق رەجيمدە جۇمىس جاساۋدا.