«قازاقستان حالقىنا» قورىنا تۇسكەن قارجى 7 قازاقستاندىق بانكتە ساقتالادى. قارجى نەلىكتەن 7 بانكتە ساقتالادى؟ بۇل سۇراققا قور باسشىسى بولات جامىشەۆ «وشاكباەۆ LIVE» تەلەباعدارلاماسىنىڭ ەفيرىندە جاۋاپ بەردى, دەپ حابارلايدى Egemen.kz.
«قورعا تۇسكەن قارجى 7 بانكتە بولادى. بارلىعى دا - وتاندىق بانكتەر. ياعني, قايىرىمدىلىق جاساعان ادام نەمەسە ۇيىم قارجىنى قاي بانك ارقىلى جىبەرەدى, اقشا سول بانكتە بولادى. قور اشىلا سالا العاشقى قارجى Halyk Bank ارقىلى ءتۇستى.
ودان كەيىن kaspi.kz جانە تاعى 5 بانككە قايىرىمدىلىق قارجىسى تۇسە باستادى. قارجىعا ءبىز جاۋاپتى بولعاندىقتان, حالىق سەنىمىنە كىرگەن, نەسيە جۇيەسى وڭ جولعا قويىلعان بانكتەر تاڭدالدى.
ودان ءارى وتاندىق ءىرى كاسىپورىندارمەن تىكەلەي جۇمىس ىستەيتىن بولامىز. ال ورتا جانە شاعىن كاسىپورىندارمەن «اتامەكەن» ۇلتتىق كاسىپكەرلەر پالاتاسى ارقىلى مەموراندۋم جاسايمىز», دەدى ب. جامىشەۆ.
سونداي-اق قور باسشىسى قاتىسۋشىلار كەڭەسىنىڭ قۇرىلاتىنىن العا تارتتى. ول كەڭەستە قارجىنىڭ قانشالىقتىڭ ءتيىمدى جۇمسالىپ جاتقانى قارالادى.
«كولەڭكەلى تابىسقا كەنەلىپ جۇرگەندەر قورعا قارجى اۋدارسىن دەگەن ۇسىنىستاردى ەستىپ جاتىرمىن. قارجى حالىق يگىلىگىنە جۇمسالادى. سوندىقتان قورعا ادال جولمەن تاپقان تابىستىڭ تۇسكەنىن قالايمىز. مەن ءۇشىن قايىرىمدىلىق قاراجاتتىڭ قايدا جۇمسالاتىنى وتە ماڭىزدى», دەيدى ول.
ودان بولەك, بولات جامىشەۆ ءوزىنىڭ قور توراعاسى بولىپ تاعايىندالۋىنا قاتىستى ءبىر اۋىز پىكىر ءبىلدىردى.
«مەنى توراعا ەتىپ قوردىڭ قامقورشىلىق كەڭەسى مۇشەلەرى سايلادى», دەپ قىسقا قايىردى.