باتىس قازاقستان «قىزىل» ايماققا كىردى

جاڭا جىلدىڭ 13 كۇنىندە وڭىردە 537 ادامعا «covid-19» دياگنوزى قويىلعان. ال جالپى ەپيدەميا باستالعالى وبلىستا 40 607 ادام COVID-19 جۇقتىرىپ, 15 282 ادام ينفەكتسيالىق ستاتسيونارلاردا ەم العان. 857 ادام وسى دەرتتەن كوز جۇمدى.

«باتىس قازاقستان وبلىسىندا 13 قاڭتار كۇنى عانا 186 ادامنىڭ اۋىرعانى تىركەلدى. جاڭا جىلدان بەرى وبلىستا 18 وقۋشى, 14 مۇعالىم, 3 بالاباقشا قىزمەتكەرى, 4 ستۋدەنت وسىنداي دياگنوزبەن تىركەلدى», دەدى وبلىستىق دەنساۋلىق ساقتاۋ باسقارماسى مەديتسينالىق كومەكتى ۇيىمداستىرۋ ءبولىمىنىڭ باسشىسى ايگۇل قۇلباراقوۆا.

ناۋقاستاردىڭ كوبى, ياعني 360-ى ورال قالاسىندا تۇرادى. بايتەرەك اۋدانىندا – 64, ءبورلى اۋدانىندا – 59, تەرەكتى اۋدانىندا – 17, جاڭاقالا اۋدانىندا – 14 جاعداي تىركەلگەن.

سوڭعى اپتادا وتكەن اپتامەن سالىستىرعاندا اۋرۋشاڭدىق دەيگەيى 85,9%-عا (65-تەن 464-كە) وسكەن!

«كوروناۆيرۋستىق ينفەكتسيا احۋالى وبلىستا دا, ەلىمىزدە دە ناشارلاپ بارادى. سونداي-اق جاڭا «وميكرون» شتامىن جۇقتىرۋ قاۋپى بار. جاڭا شتامنىڭ ەرەكشەلىگى سول, جۇقتىرۋ قاۋپى جوعارى, ءارى ۆيرۋستى قايتا جۇقتىرۋ ىقتيمالدىعى دا وتە ۇلكەن. ۆيرۋس ءبىرىنشى تۇسەتىن جوعارى تىنىس جولدارىندا «وميكرون» «دەلتا» شتامىنا قاراعاندا 70 ەسە تەز كوبەيەدى», دەيدى باتىس قازاقستان وبلىستىق سانيتارلىق-ەپيدەميولوگيالىق باقىلاۋ دەپاراتامەنتى باسشىسىنىڭ ورىنباسارى نۇرلىبەك مۇستاەۆ.

مامانداردىڭ ايتۋىنشا, ازىرگە ناۋقاستاردى ەمدەيتىن ستاتسيوناردان دا, مەديكامەنتتەن دە تاپشىلىق جوق. اۋرۋحانالاردا ارنايى دايىندالعان توسەكتىڭ 78 پايىزى بوس تۇر.

2021 جىلدىڭ 1-ءشى اقپاندا ۆاكتسينالاۋ جۇمىسى باستالعالى وڭىردە وڭىردە ەكپەنىڭ ءبىرىنشى كومپونەنتىمەن – 258 101 (39%) ادام, ەكىنشى كومپونەنتىمەن – 244 900 ادام (37%) ەگىلگەن. سونداي-اق وبلىستا 22 902 ادام (9,3%) رەۆاكتسيناتسيادان وتكەن. ەكپە العىسى كەلەتىن تۇرعىندارعا بىرنەشە تاڭداۋ بار. سونىڭ ىشىندە «سپۋتنيك Lite» ۆاكتسيناسىنا قاتىستى پارتيانىڭ ءبىر بولىگى قازاقستانعا كەلىپ جەتكەن. جاقىن كۇندەرى وبلىسقا دا جەتكىزىلىپ, ءتيىستى قاۋلى شىققان سوڭ قولدانىلاتىن بولادى.

نۇرلىبەك مۇستاەۆتىڭ ايتۋىنشا, الداعى ۋاقىتتا ەكى ەسە كوبەيۋى مۇمكىن.

باتىس قازاقستان وبلىسىنداعى ۆەدومستۆوارالىق كوميسسيانىڭ شەشىمىنە وراي, ەپيدەميولوگيالىق احۋال جاقسارعانعا دەيىن وبلىس اۋماعىندا قوعامدىق ورىنداردا, كوشەدە ءجانى وتباسىندا دا بارلىق كوپشىلىك شارالاردى وتكىزۋگە تيىم سالىندى. بۇل جەردە تەك مارقۇمدى سوڭعى ساپارعا شىعارىپ سالۋ ءۇشىن عانا 30 ادامعا دەيىن جينالۋعا رۇقسات بەرىلەدى. ال تەاتر, فيلارمونيا, تسيرك, كونتسەرت زالدارىندا كوپشىلىك شارالار ۋاقىتشا توقتايدى, جۇما ناماز, ءدىني قۇلشىلىقتار وتپەيدى. تۇنگى كلۋبتار, كاراوكە بارلار توقتايدى. جەكە كەزدەسۋلەردە 10 ادامنان ارتىق جينالۋعا بولمايدى جانە بۇل ادامدار ەكپە العان بولۋى ءتيىس. قوعامدىق تاماقتانۋ ورىندارىندا ءبىر ۇستەلدە 4 ادامنان ارتىق وتىرۋعا تيىم سالىنادى. «اشىق» جوباسىنا قاتىساتىن كينوتەاترلار تەك زالدىڭ 30 پايىزىنا عانا بيلەت ساتادى. كوممۋنالدىق شارۋاشىلىق كاسىپورىندارىنان بولەك مەملەكەتتىك مەكەمەلەر 70 پايىزعا دەيىن قىزمەتكەرلەرىن قاشىقتان جۇمىس رەجيمىنە اۋىستىرۋى ءتيىس.

جاقىن كۇندەرى ورتا ءبىلىم سالاسىندا قىسقى كانيكۋل اياقتالماق.

نۇرلىبەك مۇستاەۆتىڭ ايتۋىنشا, «قىزىل ايماق» ستاتۋسى كەزىندە وڭىردەگى وقۋشى سانى 600-گە جەتپەيتىن اۋىل مەكتەپتەرىندە وقۋ ءۇردىسى ادەتتەگىدەي جۇرەدى. ال شاكىرت سانى 600-دەن اساتىن ءىرى مەكتەپتەر ونلاين وقۋ فورماتىنا كوشەدى. كوللەدجدەر مەن جوعارى وقۋ ورىندارى ستۋدەنتتەرى جاعدايعا قاراي ارالاس فورماتتا ءبىلىم الادى.