«بولاشاق» باعدارلاماسىنىڭ ستيپەندياتتارىنا دۇنيەجۇزىلىك دەنساۋلىق ساقتاۋ ۇيىمى ماقۇلداعان ۆاكتسينالارعا قولجەتىمدىلىك قامتاماسىز ەتىلدى, دەپ حابارلايدى Egemen.kz.
بۇل ماسەلە ءبىلىم جانە عىلىم مينيسترلىگىنىڭ ءوتىنىشى بويىنشا كوروناۆيرۋستىق ينفەكتسيانىڭ پايدا بولۋى مەن تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ وتىرىسىندا قارالدى. ناتيجەسىندە ۆاك ستيپەندياتتاردى ددۇ ماقۇلداعان ۆاكتسينامەن ۆاكتسينالاۋعا رۇقسات بەردى.
وسىنداي شەشىمنىڭ ارقاسىندا «بولاشاق» ستيپەندياسىنىڭ يەگەرلەرى ددۇ ماقۇلداعان ۆاكتسينالاردى العان كەزدە عانا كىرۋگە رۇقسات ەتىلگەن ەلدەرگە كەدەرگىسىز بارا الادى.
ەستەرىڭىزگە سالا كەتەيىك, 2021 جىلدىڭ 8 قاراشاسىنان باستاپ اقش-قا ددۇ ماقۇلداعان ۆاكتسينالار العان ادامدارعا عانا كىرۋگە رۇقسات ەتىلەدى. بۇل تىزىمگە Pfizer-BioNTech, Moderna, Johnson&Johnson, AstraZeneca, Covishield, BIBP/Sinopharm, Sinovac ۆاكتسينالارى كىرەدى. ۇقساس ەرەجەلەر اۆسترالياعا جانە بىرقاتار باسقا ەلدەرگە كىرۋ ءۇشىن دە قولدانىلادى.
«اۆسترالياعا, كاناداعا, جاڭا زەلاندياعا, اقش-قا جانە جاپونياعا وقۋعا نەمەسە تاعىلىمدامادان وتۋگە باراتىن «بولاشاق» ستيپەندياتتارىنىڭ وقۋلارىنا كەدەرگى كەلتىرمەۋ ءۇشىن بعم دسم-گە ددۇ ماقۇلداعان ۆاكتسينانى بەرۋ مۇمكىندىگىن قاراۋ تۋرالى حات جولدادى. اتالعان ەلدەردىڭ اۋماعىنا كىرۋ ءۇشىن ددۇ ماقۇلداعان پرەپاراتتاردىڭ ەكى دوزاسىمەن تولىق ۆاكتسيناتسيالاۋ قاجەت ەكەنىن اتاپ وتكەن ءجون. ۆاك ءبىزدىڭ ۇسىنىسىمىزدى قولدادى. ناتيجەسىندە BIBP/Sinopharm ۆاكتسيناسىن الۋعا رۇقسات بەرىلدى», دەدى قر ءبىلىم جانە عىلىم ۆيتسە-ءمينيسترى قۋانىش ەرعاليەۆ.