قالا قاقپالارىنا قويىلعان بلوك-بەكەتتەر ءالى دە كولىكتەر مەن جەكە تۇلعالاردى قالت جىبەرمەي قاداعالاپ تۇر. بۇل ىسكە ءارتۇرلى كۇشتىك قۇرىلىمداردىڭ جۇزدەگەن وكىلى جۇمىلدىرىلعان.
باقىلاۋ بەكەتتەرىنەن بولەك كۇدىككە ىلىنگەن پاتەرلەر مەن جەكە ۇيلەردى دە تەكسەرۋ جۇمىستارى جۇرگىزىلۋدە. ءتيىستى قۇرىلىمدار ءتىنتۋ بارىسىندا جارىق دىبىستىق گراناتالار, تونالعان تۇرمىستىق تەحنيكالار, ءموبيلدى قۇرىلعىلار مەن سۋىق قارۋلاردى تاركىلەگەن. قىلمىستىق جاۋاپكەرشىلىككە تارتىلعانداردىڭ سانى ءسات سايىن جاڭارۋدا. كومەنداتۋرا كەلتىرگەن سوڭعى دەرەك بويىنشا لاڭكەستىك, توناۋ جانە باسقا دا ىستەرگە قاتىسى بار دەگەن كۇدىكپەن 1 237 ادام ۇستالعان. ودان بولەك, 31 اتىس قارۋى مەن 1 428 وق-ءدارى تاركىلەنىپ, بلوك-بەكەتتەردە تاعى دا 38 ادام قولعا تۇسكەن. جاۋاپتى ورىندار «102» باسقارۋ پۋلتىنە بارلىعى 608 حابارلاما, كومەنداتۋرانىڭ call-ورتالىعىنا ازاماتتاردان جەدەل ارەكەت ەتۋدى تالاپ ەتەتىن 253 دابىل تۇسكەنىن مالىمدەدى.
ماسەلەن, المالى اۋدانىنىڭ پوليتسيا قىزمەتكەرلەرى بايتۇرسىن ۇلى كوشەسىندەگى جالدامالى پاتەرلەردىڭ بىرىنەن قالانى تالقانداۋعا قاتىستى دەپ كۇدىككە ىلىنگەن 8 ادامدى ۇستادى. «تۇرعىن ۇيدەن اسكەري قۇرالدار مەن قالا دۇكەندەرىندە قولدى بولعان تۇرمىستىق, تسيفرلى تەحنيكالار تابىلدى. ۇستالعانداردىڭ 6-اۋى جامبىل وبلىسىنىڭ, تاعى 2-ەۋى تالدىقورعان قالاسىنىڭ تۇرعىنى. ۇلكەنىنىڭ جاسى 25-تە بولسا, ەڭ كىشىسى نەبارى 19 جاستا», دەپ مالىمدەدى پوليتسياداعىلار.
كومەنداتۋرانىڭ اقپاراتتىق ءبولىمى قالادا لاڭكەستەرگە قارسى كۇرەس ءالى دە جالعاسىپ جاتقانىن, 11 قاڭتار كۇنگى دەرەك بويىنشا, اۋەزوۆ, الاتاۋ جانە مەدەۋ اۋداندارىنىڭ اۋماعى, «وجەت» شاعىن اۋدانى مەن «الماتى» حالىقارالىق اۋەجايىنا شەكارالاس اۋماقتا لاڭكەستەردەن تازارتۋ جۇمىستارى قارقىندى جۇرگىزىلگەنىن حابارلادى. بۇعان دەيىن شاھاردىڭ سايىن – رايىمبەك – كارەرنايا – جاندوسوۆ كوشەلەرىنىڭ اۋماعى قىلمىسكەرلەردەن تازارتىلعانى تۋرالى اقپارات تاراعان بولاتىن.
اكىم باقىتجان ساعىنتاەۆ ويراننان ەڭ كوپ زارداپ شەككەن الماتىنىڭ تىنىس-تىرشىلىگىن قالپىنا كەلتىرۋ بويىنشا اقپاراتتىق كەڭەس وتكىزىپ, مەگاپوليس ءومىرىن ارناعا ءتۇسىرۋدىڭ جوسپارىن تانىستىردى. قالا باسشىسى اكىمدىك عيماراتىنىڭ قيراۋىنا بايلانىستى قالا اكىمدىگى ۋاقىتشا المالى اۋدانى اكىمدىگىنىڭ عيماراتىندا جۇمىسىن جالعاستىراتىنىن ايتتى. تيىسىنشە زارداپ شەككەن قالالىق كەڭسەلەر دە باسقا عيماراتتارعا ۋاقىتشا كوشىرىلەدى.
بۇگىن, ياعني 12 قاڭتاردان باستاپ الماتىدا بارلىق قوعامدىق كولىكتەر قالىپتى جۇمىسىنا كىرىسەدى. توتەنشە جاعدايعا بايلانىستى جۇمىس كەستەسى قالالىق مارشرۋتتار ءۇشىن ساعات 08.00-دەن 20.00-گە دەيىن جۇمىس ىستەيدى.
پرەزيدەنت تاپسىرماسىنا ساي, جۇرت باسىنا بۇلت ۇيىرگەن قاندى وقيعا ەندى قايتالانباس ءۇشىن كۇن ساناپ اۋماعى ارتقان شاھارداعى قاۋىپسىزدىك ماسەلەسى بارىنشا كۇشەيە تۇسپەك. الماتى قالالىق پوليتسيا دەپارتامەنتىنىڭ باسشىسى ءارى قالا كومەندانتى قانات تايمەردەنوۆ جاعدايدىڭ تولىق باقىلاۋدا ەكەنىن جەتكىزدى. ءدۇيىم ەلدى دۇرلىكتىرگەن دۇربەلەڭدە بەيبىت تۇرعىندارمەن قاتار قۇقىق قورعاۋ سالاسىنىڭ قىزمەتكەرلەرى قاتتى زارداپ شەكتى. قالانىڭ باس پوليتسەيى قىزمەت بابىندا قازا بولعان پوليتسەيلەردىڭ ۇيىنە بارىپ, كوڭىل ايتتى. بۇعان دەيىن حابارلاعانىمىزداي, پوليتسيا سەرجانتى الەن اسىلحانوۆ, پوليتسيا ستارشيناسى رينات قامبەتوۆ پەن پوليتسيا كىشى سەرجانتى نۇربولسىن الماسوۆ قالانى قورعاۋ بارىسىندا لاڭكەستەردىڭ قولىنان قازا تاپقان بولاتىن.
«ەلىمىزگە سىن ساعات تونگەندە ەرلىكپەن ومىردەن وتكەن ارىپتەستەرىمىزدىڭ تۋىستارىمەن بىرگە قايعىرامىز. ولار ازاماتتاردىڭ قاۋىپسىزدىگى ءۇشىن جانىن قيعان باتىرلار. ازاماتتاردىڭ وتان الدىنداعى جانقيارلىق قىزمەتى بىزگە دە, بولاشاق ۇرپاققا دا جارقىن ۇلگى بولماق», دەيدى قانات تايمەردەنوۆ.
سونداي-اق قالا كومەندانتى تۇرعىنداردى ساق بولۋعا شاقىرىپ, بالالار مەن ەگدە ادامداردى قاراۋسىز قالدىرماۋ جايىن ەسكەرتتى. بالەنىڭ بەتى بەرى قارادى دەسەك تە, ارقانى كەڭگە سالۋعا ەرتە, سوندىقتان مۇقيات بولعان ابزال.
الماتى