نۇر-سۇلتان قالاسىنداعى حالىقارالىق مەكتەپ وقۋشىلارىنىڭ سوزىنە قاراعاندا, ءداستۇرلى ءبىلىم بەرۋ تاجىريبەگە قاراعاندا تەورياعا كوپ جۇگىنەدى. بۇل ولقىلىقتىڭ ورنىن تولتىرۋ ماقساتىندا ولار ۆيرتۋالدى شىندىق تەحنولوگياسى نەگىزىندە Accessus (لاتىن تىلىندە «قولجەتىمدىلىك») ءموبيلدى قوسىمشاسىن دايىندادى.
وقۋشىلاردىڭ كوماندالىق جۇمىسى STEM (جاراتىلىستانۋ عىلىمدارى جانە ينجەنەريا) بلوگىنىڭ پاندەرىن ۇيرەنۋگە باعىتتالعان. بۇل كەز كەلگەن وقۋشىعا جاراتىلىستانۋ پاندەرىن تاجىريبە جۇزىندە قىزىقتى ءارى كورنەكتى ەتۋگە مۇمكىندىك بەرەدى.
– كوپتەگەن مەكتەپتە وقۋشىلار تەك تەوريالىق ءبىلىم الاتىندىقتان, زەرىگىپ, سودان وقۋ ۇلگەرىمى تومەندەۋى بايقالادى. جوبا ارقىلى وقۋشىلار عىلىمي پاندەردى وپتيكالىق ماتەريالدار بويىنشا وقۋعا مۇمكىندىك الادى. قازىر عىلىمي پاتەنت الۋ ۇستىندەمىز. كوپ ۇزاماي قوسىمشانى AppStore جانە PlayMarket-تە ىسكە قوساتىن بولامىز, – دەيدى كوماندا كاپيتانى الىبەك سەيتوۆ.
بالالاردىڭ ايتۋىنشا, جۇمىستىڭ كوپ بولىگى يدەيانى جەتىلدىرۋگە جۇمسالدى: توپتىڭ ءبىر بولىگى ۆيرتۋالدى كورىنىستەر نەمەسە بولمەلەر (پايدالانۋشى ەكسپەريمەنتتەر جۇرگىزەتىن جەر) جاساۋعا كوڭىل بولسە, كەيبىرى زەرتتەۋ ماتەريالداردى قاراپايىم جانە تۇسىنىكتى تىلدە جازىپ, وزگەلەرى ءموبيلدى قوسىمشانىڭ جۇمىسىن تەكسەرىپ, قاتەلىكتەرىن انىقتاعان. قوسىمشا – جوعارى سىنىپ وقۋشىلارىنىڭ توپتىق ەڭبەگىنىڭ جەمىسى.
– ءبىز وقۋشىلار ناقتى عىلىمداردىڭ قاعيداتتارىن جەڭىل يگەرە الاتىن دۇنيە جاسادىق. مىسالى, جاسۋشالاردىڭ قۇرىلىمى, اۋىرلىق ءپرينتسيپى سەكىلدى تاقىرىپتار. بارلىق كۇش-جىگەرىمىزدى عىلىمي سالالارداعى شىعارماشىلىق كوزقاراس تۇجىرىمداماسىن جاڭعىرتۋعا جانە جۇيەلەۋگە باعىتتادىق, – دەپ ءتۇسىندىردى 9-سىنىپ وقۋشىسى, قوسىمشانىڭ تەحنيكالىق بولىگىنە جاۋاپتى مامان ينسار تۋنگۋشباەۆ.
وقۋشىلار الدىمەن ءموبيلدى قوسىمشانى ءوز مەكتەپتەرىندە پايدالانۋدى جوسپارلاپ, ونى 9 ب سىنىبىنىڭ فيزيكا ساباعىندا سىناپ كوردى.
– قوسىمشانىڭ تيىمدىلىگىن اتاپ وتكىم كەلەدى. ءبىر روليكتىڭ ىشىندە ءبىز اۋىرلىق زاڭى جانە ماسسا ۇعىمدارىمەن تانىستىق, – دەيدى 9-سىنىپ وقۋشىسى سانجار.
Accessus جوباسى Solve for Tomorrow رەسپۋبليكالىق بايقاۋىنىڭ قازىلار القاسىنىڭ دا كوڭىلىنەن شىقتى. وقۋشىلار ءموبيلدى قوسىمشانى جۇزەگە اسىرۋ ماقساتىندا 450 مىڭ تەڭگە كولەمىندەگى سىياقى الدى. 2010 جىلى اقش-تا قۇرىلعان Solve for Tomorrow باعدارلاماسى قازىر الەمنىڭ 23 ەلىندە جۇمىس ىستەيدى, – دەيدى نۇر-سۇلتان حالىقارالىق مەكتەبىنىڭ ءباسپاسوز حاتشىسى قۇرالاي يساەۆا.