بۇگىن تۇسكى ۋاقىتتا جەتىسۋ وبلىسىندا جەر سىلكىنىسى بولدى. كەيبىر الماتىلىقتار دا الەۋمەتتىك جەلىلەردە قالانىڭ جەكەلەگەن اۋداندارىندا ءالسىز ءدۇمپۋدى سەزگەنىن جازدى. وقيعاعا توتەنشە جاعدايلار مينيسترلىگىنىڭ ءباسپاسوز قىزمەتى تۇسىنىكتەمە بەردى, دەپ جازادى Egemen.kz.
ۆەدومستۆو تاراتقان اقپاراتتا «جەر سىلكىنىسىنىڭ وشاعى قازاقستان اۋماعىندا, الماتى قالاسىنان سولتۇستىك-شىعىسقا قاراي 284 شاقىرىم جەردە ورنالاسقان» دەپ كورسەتىلگەن.
مەكسيكادا ماگنيتۋداسى 6,5 بالدىق جەر سىلكىنىسى بولدى
ءدۇمپۋ جەتىسۋ وبلىسىنىڭ بىرقاتار ەلدى مەكەندەرىندە سەزىلگەن. پانفيلوۆ اۋدانىنىڭ جاركەنت قالاسىندا, تەكەلى قالاسىندا, اقسۋ اۋدانى جانسۇگىروۆ اۋىلىندا جانە سارقان اۋدانىنىڭ سارقان قالاسىندا ءدۇمپۋ 3 بالل دەڭگەيىندە تىركەلگەن. ەسكەلدى اۋدانى قارابۇلاق كەنتىندە, تالدىقورعان قالاسىندا, كوكسۋ اۋدانىنىڭ بالپىق بي اۋىلىندا, ۇيعىر اۋدانىنىڭ شونجى اۋىلىندا, كەربۇلاق اۋدانى سارىوزەك اۋىلىندا جانە قاراتال اۋدانىنىڭ ۇشتوبە قالاسىندا جەر سىلكىنىسىنىڭ كۇشى 2 بالل شاماسىندا بولعان. سونداي-اق الماتى وبلىسىنىڭ ۇيعىر اۋدانى قىرعىزساي اۋىلىندا, ەڭبەكشىقازاق اۋدانىنىڭ كوكپەك جانە شەلەك اۋىلدارىندا دا ءالسىز ءدۇمپۋ تىركەلدى.
تجم دەرەگىنە سايكەس, زارداپ شەككەندەر مەن قيراۋلار تۋرالى مالىمەت تۇسپەگەن.
الماتى ماڭىندا جەر سىلكىندى
سونىمەن قاتار الەۋمەتتىك جەلىلەردە الماتىلىقتار دا جەردىڭ ءسال تەڭسەلگەنىن ايتىپ, «جەڭىل ءدىرىل سەزىلدى, ازداپ شايقالىپ كەتكەندەي بولدى» دەگەن سيپاتتاعى جازبالار قالدىردى. مۇنداي حابارلامالار Threads سەكىلدى ءتۇرلى پلاتفورمالاردا جاريالانعان. الايدا قالالىق توتەنشە جاعدايلار دەپارتامەنتى الماتى اۋماعىندا جەر سىلكىنىسى تىركەلمەگەنىن جانە قالادا جەر استى دۇمپۋلەرى بولماعانىن مالىمدەدى.