قازاقستاندا مينەرالدى تىڭايتقىش وندىرەتىن زاۋىت سالۋ جوسپارلانىپ وتىر, دەپ جازدى Egemen.kz.
وندا جىل سايىن ءبىر ميلليون توننادان استام ءونىم شىعارىلادى جانە كەمىندە 1200 جۇمىس ورنى اشىلادى. جوبانى قازاقستان مەن رەسەي بىرلەسىپ جۇزەگە اسىرادى. سەناتورلار بۇگىن زاۋىتتى ىسكە قوسۋ ماقساتىندا ءتيىستى كەلىسىمدى راتيفيكاتسيالادى.
«بۇگىن قارالعان كەلىسىم زامان تالاپتارىنا ساي حيميالىق كەشەن سالۋدى جانە ونى پايدالانۋعا بەرۋدى كوزدەيدى. زاۋىت ونىمدەرى ەلىمىزدىڭ ەكونوميكاسىن دامىتۋعا ءوز ۇلەسىن قوسادى دەپ سەنەمىز», – دەدى ماۋلەن اشىمباەۆ.
قۇجاتتىڭ شارتتارى بويىنشا رەسەيلىك كومپانيا جوباعا ءبىر ميللياردتان استام اقش دوللارى كولەمىندە ينۆەستيتسيا سالىپ, قۇرىلىستى 2024 جىلى اياقتاۋعا ءتيىس. كەلىسىمدە جوبالاۋ كومپانياسىنا بىرقاتار سالىقتىق جەڭىلدىكتەر جاسالادى. اتاپ ايتقاندا, كورپوراتيۆتىك تابىس سالىعىنان جانە تاۋارلار يمپورتىنا قوسىلعان قۇن سالىعىنان بوساتۋ كوزدەلىپ وتىر. قۇجاتتا سونداي-اق قازاقستاندىق مامانداردى مىندەتتى تۇردە كاسىپورىنعا جۇمىسقا ورنالاستىرۋ تۋرالى تالاپ جازىلعان. بۇل جوبادا كەمىندە 80 پايىزى وتاندىق كادرلار جۇمىس ىستەيدى.