الماتىدا 2021 جىلدىڭ 11 ايىندا قىزىلشا جۇقتىرعاندار سانى 1282-گە جەتتى. بۇل تۋرالى الماتى قالالىق سانيتارلىق-ەپيدەميولوگيالىق باقىلاۋ دەپارتامەنتى مالىمدەدى, دەپ حابارلايدى Egemen.kz.
سانيتاريا دارىگەرلەرى قالا بويىنشا 2021 جىلدىڭ 11 ايىندا قىزىلشا اۋرۋىن جۇقتىرعان 1282 دەرەك تىركەلگەنىن ايتتى. كەيىنگى جىلدىڭ وسى كەزەڭىمەن سالىستىرعاندا جۇقتىرعاندار 30 پايىزعا تومەندەگەنى بايقالادى. الايدا بۇل ستاتيستيكادا جەلتوقسان ەسەپكە الىنباعان.
«14 جاسقا دەيىنگى بالالار ءالى دە قىزىلشامەن اۋىرادى, ولاردىڭ ۇلەسى - 87,4 پايىز, جاسوسپىرىمدەر - 1 پايىز, ەرەسەكتەر اراسىندا - 11,6 پايىز. مەگاپوليستە قىزىلشا اۋرۋى بويىنشا ەپيدەميولوگيالىق جاعداي تۇراقتى», دەدى دەپارتامەنت وكىلى.
دەپارتامەنت تاراپىنان بارلىق وشاقتا ەپيدەمياعا قارسى ءىس-شارالار, سونىڭ ىشىندە حالىققا ءتۇسىندىرۋ جۇمىستارى جۇرگىزىلگەن. مەديتسينالىق ۇيىمداردىڭ قىزمەتكەرلەرى اۋىرعان اداممەن بايلانىستا بولعانداردى باقىلاپ, بارلىق ناۋقاسقا سيمپتوماتيكالىق ەمدەۋ تاعايىنداعان.
«اۋرۋعا قارسى ناقتى شارا جوق. حالىققا سپەتسيفيكالىق ەمەس پروفيلاكتيكانىڭ جالپى شارالارىن ساقتاۋ قاجەت: ادام كوپ جينالاتىن ورىندارعا بارماۋ, قوعامدىق ورىندارعا بارعان كەزدە بەتپەردە تاعۋ, ءۇي-جايدى ءجيى جەلدەتۋ جانە قول جۋ. سونداي-اق, اتا-انالارعا اۋرۋ بەلگىلەرى بار بالالاردى كوپشىلىك جەرگە, مەكتەپتەرگە جىبەرمەۋگە كەڭەس بەرەمىز», دەپ ەسكەرتتى سانيتاريا دارىگەرلەرى.