كەلەسى جىلدىڭ 22 قاڭتارىندا اقتاۋدا كاسىپقوي بوكس كەشى وتەدى. سول جارىستا قازاقستاننىڭ جانە شەت مەملەكەتتەردەن كەلگەن بىرقاتار تانىمال بىلعارى قولعاپ شەبەرلەرى ونەر كورسەتەدى.
وتاندىق Adal Promotions كومپانياسىنىڭ ۇيىمداستىرۋىمەن وتكەلى وتىرعان ءدۇبىرلى دودادا 28 جاستاعى مەيىرىم نۇرسۇلتانوۆ تا كۇش سىناسادى. بۇل ەسىم جانكۇيەرلەرگە جاقسى تانىس. شىعىس قازاقستان وبلىسى اياگوز اۋدانىنىڭ تۋماسى كەزىندە جاستار اراسىندا ازيا بىرىنشىلىگىنىڭ جەڭىمپازى جانە ەرەسەكتەر اراسىندا ەل چەمپيونى اتاندى. 2016 جىلدان بەرى نۇرسۇلتانوۆ كاسىپقوي رينگتە جۇدىرىقتاسۋدا. وسى ارالىقتا 15 كەزدەسۋ وتكىزگەن قانداسىمىز بارلىعىندا جەڭىسكە جەتىپ, سەگىز باسەكەنى مەرزىمىنەن بۇرىن اياقتادى.
مەيىرىمنىڭ دە قارسىلاسى دا وسال ەمەس. 36 جاستاعى رەسەيلىك بوكسشى اندرەي سيروتكين 21 مارتە شارشى الاڭعا كوتەرىلىپ, 19 رەت جەڭىسكە جەتتى. جەتى باسەكەدە ايقىن باسىمدىق تانىتتى. ءبىر رەت ۇتىلىپ, تاعى ءبىر كەزدەسۋدە تەڭ ەسەپ تىركەلدى. وسىدان ءتورت جىل بۇرىن سيروتكين ءوز ەلىندە نيكاراگۋانىڭ اتاقتى بوكسشىسى, الەمنىڭ ەكس-چەمپيونى ريكاردو مايورگانى ۇتقان. بۇل جەكپە-جەكتە ورتا سالماقتاعى WBO International نۇسقاسىنىڭ التىن بەلبەۋى ساراپقا سالىنادى.