قازىر ەكپەنىڭ ساۋلىققا زارەدەي دە زيانى جوعىن, قايتا ساۋلىق ءۇشىن كەرەك ەكەنىن ەكىنىڭ ءبىرى ءبىلىپ قالدى عوي.
مەن ۆاكتسينانىڭ العاشقى لەگىندە جۇكتىلىگىمە بايلانىستى ەكپە الماعان بولاتىنمىن. وسىدان دا ءوزىمنىڭ, ومىرگە كەلەتىن ءسابيىمنىڭ ساۋلىعىنا الاڭداپ ءجۇردىم. ەلىمىزگە Pfizer ۆاكتسيناسى جەتكەندە ەش ويلانباستان سالدىرام دەپ بايلام جاساۋىمنىڭ سەبەبى دە وسى ەدى.
بيىل 23 قاراشادا اۋدان ورتالىعى شيەلىگە بارىپ ءبىر توپ كەلىنشەك ۆاكتسينا الدىق. ەكپەدەن كەيىن دارىگەرلەر باقىلاۋىندا بولدىق. ءجيى-ءجيى قىزۋىمىزدى ولشەپ, كەڭەسىن ايتقان ماماندارعا ريزامىز. 9 جەلتوقساندا امان-ەسەن بوساندىم.
ءالى دە بولسا وسى ەكپەنىڭ اينالاسىندا الىپقاشپا اڭگىمە كوپ. مەنىڭ ايتارىم – ەكپە سالدىرۋ كەرەك. ىندەتتىڭ الدىن الۋدىڭ وسىدان باسقا جولى جوق.
ساندۋعاش مىرزاحانقىزى
قىزىلوردا وبلىسى,
شيەلى اۋدانى,
بايگەقۇم اۋىلى
ەكپە الىپ, امان-ەسەن بوساندىم
مەنى 3 جەلتوقساندا كەمەر اۋىلىنداعى امبۋلاتوريانىڭ مەدبيكەسى ەكپە الۋعا شاقىردى. بۇل كەزدە جۇكتىلىكتىڭ 34-35 اپتاسىندا بولاتىنمىن. شاقىرعان كۇنى بارىپ Pfizer ەكپەسىن سالدىردىم.
ەش اسەر ەتپەدى. ۇيگە كەلگەندە دە ەشقانداي اۋىرسىنۋدى سەزىنگەن جوقپىن. دەنە قىزۋىم كوتەرىلگەن جوق. ءۇيدىڭ شارۋاسىن ىستەپ, قالىپتى جاعدايدا ءجۇردىم. سودان 23-ءى كۇنى تولعاق باستالعان سوڭ ءتۇس اۋا كولىكپەن اقتوبەگە جەتىپ, وبلىستىق پەرزەنتحاناعا ءتۇستىم. تولعاق قالىپتى باستالىپ, بىرەر ساعاتتان كەيىن ءوز كۇشىممەن ۇل بوساندىم. سابيىمدە دە ەش وزگەرىس بولعان جوق. ءۇش كۇننەن كەيىن پەرزەنتحانادان شىعاردى. قازىر ۇيدەمىن, بالام تىنىش.
بۇل – مەنىڭ ءۇشىنشى ءسابيىم. ءوزىم كەمەر اۋىلىنداعى سارالجىن ورتا مەكتەبىندە پسيحولوگ مۇعالىم بولىپ جۇمىس ىستەيمىن. جولداسىم دا وسى مەكتەپتە مۇعالىم. اياعى اۋىر كەلىنشەكتەرگە بەرەر كەڭەسىم, دارىگەرلەر ەكپە الۋعا شاقىرسا, قاشپاڭىزدار. قان قىسىمىن تەكسەرتىپ, دەنساۋلىق جاعدايىڭىز قالىپتى بولسا, ەكپە الىڭىزدار دەر ەدىم. ويتكەنى ءوز دەنساۋلىعىمىز بەن ءسابي دەنساۋلىعى ءۇشىن ەڭ ءبىرىنشى جاۋاپتى – ءوزىمىز.
راۋشان قابدىعالي,
سارالجىن اۋىلدىق وكرۋگى كەمەر اۋىلىنىڭ تۇرعىنى
اقتوبە وبلىسى,
ويىل اۋدانى