قازاقستان رەسپۋبليكاسى گرەك-ريم, ەركىن جانە ايەلدەر كۇرەسى فەدەراتسياسىنىڭ (قركف) باسشىسى قىزمەتىنە ازيا كۇرەس فەدەراتسياسىنىڭ پرەزيدەنتى, UWW بيۋروسىنىڭ مۇشەسى داۋلەت تۇرلىحانوۆ سايلاندى.
ەستەرىڭىزگە سالا كەتەيىك, بيىل قازان ايىنىڭ باسىندا قركف كەزەكتەن تىس ونلاين كونفەرەنتسياسىندا گرەك-ريم, ەركىن جانە ايەلدەر كۇرەسى فەدەراتسياسىنىڭ جاڭا پرەزيدەنتى بولىپ بۇعان دەيىن ورىنباسارلىق قىزمەت اتقارعان ەرلان قوجاسباي سايلانعان بولاتىن. ول ساۋات مىڭباەۆتىڭ ورنىن باستى. جاڭا باسشى كەلە سالا فەدەراتسيانىڭ ۆيتسە-پرەزيدەنتتەرى داۋلەت تۇرلىحانوۆ, گۇزەل مانيۋروۆا, ساكەن مۇسايبەكوۆ جانە دانيار ابىلعازيندى قىزمەتىنەن بوساتتى.
جوعارىداعى جاعداي كوپشىلىكتى قاناعاتتاندىرعان جوق. مادەنيەت جانە سپورت ءمينيسترى اقتوتى رايىمقۇلوۆا مەن ۇلتتىق وليمپيادا كوميتەتىنىڭ پرەزيدەنتى تيمۋر ق ۇلىباەۆتىڭ اتىنا اشىق حات جازعان ايماقتىق فەدەراتسيا باسشىلارى سايلاۋ ناتيجەسىمەن كەلىسپەدى. وبلىستىق ۇيىم باسشىلارى سايلاۋ كەزىندە بولعان ورەسكەل زاڭ بۇزۋشىلىقتارعا توقتالىپ, قايتا سايلاۋ وتكىزۋدى سۇرادى. ولاردىڭ بۇل ءوتىنىشى قاناعاتتاندىرىلدى. ناتيجەسىندە, داڭقتى بالۋان داۋلەت تۇرلىحانوۆ كۇرەس فەدەراتسياسىنىڭ تىزگىنىن ۇستادى.