تاۋەلسىزدىكتىڭ 30 جىلدىعىنا وراي ۇلتتىق عىلىم اكادەمياسىندا قازاقستانداعى انتروپولوگيالىق زەرتتەۋلەردىڭ نەگىزىن سالۋشى عالىم, ەڭبەكتەرى الىس-جاقىن شەتەلدەرگە ءمالىم بولعان ورازاق سماعۇلوۆ جانە بەلگىلى انتروپولوگ ايناگۇل سماعۇلوۆانىڭ عىلىمداعى جولىنا ارنالعان القالى جيىن ءوتتى.
حالىقارالىق تۇركى اكادەمياسى, ۇلتتىق عىلىم اكادەمياسى جانە ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ ۇيىمداستىرۋىمەن وتكەن جيىن بارىسىندا وتاندىق انتروپولوگيا عىلىمىنىڭ دامۋى, كەلەشەگى حاقىندا عالىمدار وي تولعادى.
ۇعا پرەزيدەنتى, اكادەميك, حيميا عىلىمدارىنىڭ دوكتورى, پروفەسسور مۇرات جۇرىنوۆ ءىس-شارانىڭ تىزگىنىن ءوز قولىنا الىپ, بۇل جيىننىڭ الكەي مارعۇلان, قانىش ساتباەۆ سياقتى ەل عىلىمىنىڭ دامۋىنا وراسان زور ەڭبەك سىڭىرگەن, انتروپولوگيا عىلىمىنىڭ نەگىزىن قالاعان ورازاق سماعۇل ۇلىنىڭ وسى جولدا توككەن تەر, ەسەلى ەڭبەگىنە ارنالىپ وتىرعانىن ايتىپ ءوتتى. سونداي-اق انتروپولوگيا عىلىمىنداعى زەرتتەۋلەرىمەن قاتار اكادەميكتىڭ ءتۇبى ءبىر تۇركى جۇرتىنىڭ شىققان تەگىن زەرتتەۋدەگى وراسان زور مۇراسىنا توقتالدى. وسى ورايدا اكادەميك مۇرات جۇرىنوۆ تۇركى ەلدەرى اراسىنداعى ىقپالداستىقتى دامىتۋدىڭ ماڭىزدىلىعىنا توقتالىپ, ەكونوميكالىق, مادەني ءھام رۋحاني سالالارداعى بايلانىستاردىڭ ءارى قاراي دامي بەرەتىندىگىن اتاپ ءوتتى.
قازاق حالقى مەن ارعى بابالارىمىزدىڭ فيزيكالىق انتروپولوگياسى بويىنشا كوپجىلدىق كەشەندى زەرتتەۋلەرىنىڭ ناتيجەلەرى ورازاق سماعۇل ۇلىنىڭ ونداعان مونوگرافيالىق ەڭبەگىندە جانە 400-دەن استام عىلىمي ماقالالارى مەن باياندامالارىندا كورىنىس تاپتى.
عالىمنىڭ انتروپولوگياداعى سونى زەرتتەۋلەرى بۇگىندە الەم عالىمدارىنىڭ نازارىندا. بيىلعى جىلى قاراشا ايىندا اشعابادتا وتكەن ەكونوميكالىق ىنتىماقتاستىق ۇيىمىنا مۇشە-مەملەكەتتەردىڭ XV سامميتىندە ورازاق سماعۇلوۆتىڭ ەرەن ەڭبەگىنە حالىقارالىق قوعامداستىق جوعارى باعاسىن بەردى.
سىرتقى ىستەر مينيسترلىگىنىڭ الماتى قالاسىنداعى وكىلدىگىنىڭ باسشىسى اسقار شوقىباەۆ سامميت شەڭبەرىندە ۇيىمعا مۇشە-ەلدەردىڭ وكىلدەرى عىلىم مەن تەحنيكا سالاسىندا ۇعا اكادەميگى, بولون عىلىم اكادەمياسىنىڭ كوررەسپوندەنت-مۇشەسى, ش.ءۋاليحانوۆ اتىنداعى مەملەكەتتىك سىيلىقتىڭ لاۋرەاتى, قازاقستان رەسپۋبليكاسىنىڭ ەڭبەك سىڭىرگەن عىلىم جانە تەحنيكا قايراتكەرى, تاريح عىلىمدارىنىڭ دوكتورى, پروفەسسور ورازاق سماعۇلوۆتىڭ ەسىمى تاريح, مادەنيەت, ادەبيەت جانە بەينەلەۋ ونەرى اتالىمىندا اتالدى, دەپ اتاپ ءوتتى. وسى ورايدا ول سىرتقى ىستەر ءمينيسترىنىڭ قۇتتىقتاۋى مەن ۇيىمنىڭ ECO Award 2021 مەدالىن تابىس ەتتى.
حالىقارالىق تۇركى اكادەمياسىنىڭ ۆيتسە-پرەزيدەنتى, ساياسي عىلىمدار دوكتورى فيزۋلي ءماجيدلي اكادەميكتىڭ وسىناۋ جەتىستىگىنە وراي اكادەميا باسشىلىعىنىڭ قۇتتىقتاۋىن جەتكىزىپ, ورازاق سماعۇل ۇلىنىڭ انتروپولوگيا عىلىمىن دامىتۋعا قوسقان وراسان زور ەڭبەگىنە توقتالدى.
ورازاق سماعۇل ۇلى بۇعان دەيىن تۇركى اكادەمياسىنىڭ كۇمىس جانە التىن مەدالدارىمەن, سونىمەن بىرگە تومسەن مەدالىمەن ماراپاتتالعان بولاتىن. بۇل جولى انتروپولوگ عالىم ايناگۇل سماعۇلوۆاعا حالىقارالىق تۇركى اكادەمياسىنىڭ كۇمىس مەدالى تابىس ەتىلدى.
ءوز زەرتتەۋلەرى ارقىلى قازاق حالقىنىڭ وسىناۋ ۇلى دالانىڭ دارا يەسى ەكەنىن دالەلدەگەن ورازاق سماعۇل ۇلى اتاپ وتكەندەي, انتروپولوگيالىق ەرەكشەلىگى جاعىنان قازاقتار ەۋرازيادا تۇرىپ جاتقان حالىقتاردىڭ بىردە-بىرەۋىنە قوسىلمايتىن جەكە-دارا ەتنوس. مۇنداي ەرەكشەلىكپەن جاراتىلعان حالىق الەمدە كەمدە-كەم.
الماتى