پرەزيدەنت مۇناي ونىمدەرى نارىعىنداعى جاعدايمەن تانىستى

مەملەكەت باسشىسىنا ەلىمىزدىڭ ەنەرگەتيكا سالاسىنىڭ دامۋى جونىندە باياندالدى.

ماعزۇم مىرزاعاليەۆ تەڭىز, قاشاعان, قاراشىعاناق, «قالامقاس-تەڭىز» جانە «حازار» كەن ورىندارىنداعى جوبالاردى ىسكە اسىرۋ ارقىلى 2030 جىلعا قاراي مۇناي ءوندىرۋ كولەمىن 104,2 ميلليون تونناعا دەيىن ۇلعايتۋ جوسپارلانىپ وتىرعانىن ايتتى.

پرەزيدەنتكە مۇناي ونىمدەرى نارىعىنداعى جاعداي تۋرالى جانە الداعى ۋاقىتتا جانار-جاعارماي تاپشىلىعىن بولدىرماۋ شارالارى جونىندە مالىمەت بەرىلدى. ءمينيستردىڭ ايتۋىنشا, مۇناي وڭدەۋ زاۋىتتارىنداعى جوندەۋ جۇمىستارىنىڭ مەرزىمىن قىسقارتۋ جانە 200 مىڭ توننا كولەمىندە مۇناي ونىمدەرىنىڭ رەزەرۆتىك قورىن قالىپتاستىرۋ كوزدەلىپ وتىر.

سونىمەن قاتار مەملەكەت باسشىسىنا ەلىمىزدى گازبەن قامتۋ جوبالارى جونىندە باياندالدى. ءمينيستردىڭ اقپاراتىنا سايكەس قازىرگى تاڭدا گازبەن قامتىلعان حالىقتىڭ سانى 10,3 ميلليوننان استى, ال گازبەن قامتاماسىز ەتۋ دەڭگەيى 55 پايىزدى قۇرادى. سولتۇستىك جانە شىعىس وڭىرلەرگە گاز جەتكىزۋ ارقىلى 2030 جىلعا قاراي بۇل كورسەتكىشتى 65 پايىزعا دەيىن جەتكىزۋ جوسپارلانىپ وتىر. بۇل رەتتە «بەينەۋ – بوزوي – شىمكەنت», «بەينەۋ – جاڭاوزەن» جانە «بۇحارا – ورال» گاز قۇبىرلارىنىڭ قوسىمشا جەلىلەرىنىڭ سالىنۋى تابيعي گازعا دەگەن جوعارى سۇرانىستى وتەي الادى.

ەنەرگەتيكا ءمينيسترى پرەزيدەنتكە ەنەرگيا جۇيەسىندەگى قازىرگى احۋال جانە ەلەكتر ەنەرگياسىنىڭ تاپشىلىعىن بولدىرماۋ ءۇشىن قابىلدانعان جەدەل شارالار, سونداي-اق 2030 جىلعا دەيىن گاز, مۇناي, مۇناي-گاز-حيميا ونەركاسىبى, مۇناي وڭدەۋ, ەلەكتر ەنەرگەتيكاسى مەن جاڭارتىلاتىن قۋات كوزدەرى سالالارى بويىنشا جالپى قۇنى 30 تريلليون تەڭگە بولاتىن 157 ينۆەستيتسيالىق جوبانى جۇزەگە اسىرۋ جوسپارى جونىندە ايتتى.

كەزدەسۋ قورىتىندىسى بويىنشا قاسىم-جومارت توقاەۆ مۇناي-گاز-حيميا سالاسىن دامىتۋدىڭ اسا ماڭىزدى ەكەنىنە نازار اۋدارىپ, ماعزۇم مىرزاعاليەۆكە بىرقاتار تاپسىرما بەردى.