قازىنالى قاراعاندى وبلىسى ەلىمىزدىڭ يندۋستريالىق تىرەگى بولىپ قالا بەرەدى دەۋگە تولىق نەگىز بار. وڭىردە «ارسەلوميتتال تەمىرتاۋ» اق, «قازاقمىس» سىندى قالا قۇراۋشى الپاۋىت كاسىپورىندار ءوز الدىنا, وڭىردە باسقا دا ءوندىرىس وشاقتارى ءوسىپ كەلەدى. بۇعان مىسال رەتىندە قاراعاندىنىڭ ىرگەسىندەگى ساران قالاسىندا قولعا الىنعان جوبالاردى الۋعا بولادى.
بۇل قالاداعى بۇرىنعى رەزينا-تەحنيكا بۇيىمدارىنىڭ قاڭىراپ بوس قالعان كاسىپورنىنىڭ ورنىنا جىلىنا Yutong ماركالى 1 200 اۆتوبۋس پەن 400 بىرلىك تەحنيكا مەن ارنايى كولىك قۇرالدارىن شىعاراتىن QazTehna زاۋىتى بوي كوتەردى. بۇل كاسىپورىن ءوزىنىڭ تولىق قۋاتىنا جەتكەنىندە, ونداعى جۇمىسشىلاردىڭ سانى 1 مىڭنىڭ شاماسىندا بولادى دەگەن بولجام بار. ايتا كەتكەن ءجون بولار, الەمدەگى اسا ءىرى اۆتوبۋس ءوندىرۋشى Yutong كومپانياسىمەن بىرلەسە قۇرىلعان جوبانىڭ قۇنى شامامەن 11,9 ملرد تەڭگەنى قۇرايدى. مۇنىڭ 5,7 ملرد تەڭگەسى – قۇرىلتايشىنىڭ جەكە قارجىسى.
ماماندار قازىردىڭ وزىندە بۇل جوبانىڭ اتالعان قالا ءۇشىن «زاكىرلى جوبا» بولىپ, وبلىس ەكونوميكاسىن ارتاراپتاندىرۋعا دا مول مۇمكىندىك بەرەدى دەگەندى نىق سەنىممەن ايتادى.
بىلتىر قاراعاندى وبلىسىنا جۇمىس ساپارىمەن كەلگەن مەملەكەت باسشىسى قاسىم-جومارت توقاەۆ وبلىس ورتالىعىنداعى جاڭادان پايدالانۋعا بەرىلگەن №104 مەكتەپ-گيمنازياعا اۆتوبۋس سىيعا تارتقان بولاتىن. بۇگىندە سارانداعى زاۋىتتىڭ دا قاتىسى بار سول اۆتوبۋس وقۋشى بالالارعا ساپالى قىزمەت كورسەتىپ ءجۇر. بۇدان بولەك, كاسىپورىننىڭ ونىمدەرى قاراعاندى جانە ساران قالالارىنداعى جولاۋشىلار تاسىمالى قىزمەتىنە دە پايدالانىلا باستادى. اتالعان تەحنيكا تۇرلەرى قوعامدىق تاسىمالداۋ سالاسىنداعى حالىقارالىق ساپا ستاندارتتارى تالاپتارىنا تولىق جاۋاپ بەرەدى. اۆتوبۋستار مۇمكىندىگى شەكتەۋلى جاندارعا ارنالعان ارنايى پاندۋستارمەن, ورىندارمەن, ەلەكتروندى بيلەت بەرۋ جانە باقىلاۋ جۇيەسىمەن جابدىقتالعان.
سوڭعى مالىمەتكە سايكەس, قازىرگى ۋاقىتتا ساران زاۋىتىنىڭ وبلىس ورتالىعىندا – 24, ساتباەۆ قالاسىندا 32 اۆتوبۋسى جولاۋشىلارعا قىزمەت كورسەتەدى. جەزقازعان قالاسىنا بولىنگەن 31 اۆتوبۋستىڭ 20-سى جەتكىزىلگەن. سونداي-اق سولتۇستىك قازاقستان وبلىسىنا – 100 اۆتوبۋس, الماتى قالاسىنا 8 كولىك جىبەرىلىپتى. ءبىلىم جانە عىلىم مينيسترلىگىنىڭ كەلىسىمى بويىنشا بارلىق وبلىستىق ءبىلىم باسقارمالارىمەن ارادا وقۋشىلار اۆتوبۋستارىن ساتىپ الۋعا كەلىسىمشارت جوبالارى ازىرلەنىپ جاتقان كورىنەدى.
ايتا كەتۋ كەرەك, سارانداعى زاۋىتتىڭ كونۆەيەرىنەن قالالىق اۆتوبۋستاردىڭ ءتورت مودەلى شىعادى. ونىڭ قاتارىندا ىشىنە 51 ادام سىياتىن, ۇزىندىعى 8,5 مەترلىك اۆتوبۋستان 103 ورىندىقتى 12 مەتردەي ۇزىن كولىككە دەيىن بار. جاڭا زاۋىت قالالىق, قالاارالىق جانە مەكتەپكە ارنالعان اۆتوبۋستاردى شىعارۋمەن عانا شەكتەلمەي, سونىمەن قاتار ەلەكتر اۆتوبۋستارىن ءوندىرۋدى دە جوسپارلاپ وتىر. ال بيىل اۋىر جۇك تەحنيكالارىن قۇراستىرۋ جۇمىستارى باستاۋ الدى. ونىڭ ىشىندە 40 جانە 60 توننا جۇك كوتەرەتىن كەنىش كولىگىنىڭ ەكى ءتۇرى دە بولادى. جالپى, كاسىپورىن باسشىلارى ساران زاۋىتىنىڭ ءونىمى ەل ىشىندە عانا ساتىلىپ قويماي, جاقىن شەتەلدەرگە ەكسپورتتالاتىنىن دا ايتادى. جاڭا جوبانىڭ قاراعاندى وبلىسى ەكونوميكاسىنىڭ دامۋىنا جانە وتاندىق اۆتوبۋستار جاساپ شىعارۋ ارقىلى قوعامدىق كولىك قورىن جاڭارتۋ جانە جاڭعىرتۋ باعدارلاماسىن جۇزەگە اسىرۋعا يگى ىقپالىن تيگىزەدى دەگەن سەنىم بار.
ساران قالاسىندا قولعا الىنعان ەكىنشى ءىرى جوبا – اۆتوكولىك شينالارىن شىعاراتىن زاۋىت قۇرىلىسى. رەسەيلىك «تاتنەفت» كومپانياسىمەن بىرلەسىپ جۇزەگە اسىرىلىپ جاتقان بۇل جوباعا سالىناتىن ينۆەستيتسيانىڭ جالپى كولەمى شامامەن 111 ملرد تەڭگەنى قۇرايدى. بۇگىندە جاڭا كاسىپورىننىڭ قۇرىلىسى قىزۋ جۇرگىزىلۋدە. ماماندار جاڭا زاۋىتتىڭ قازاقستاننىڭ, اتاپ ايتقاندا, قاراعاندى وبلىسىنىڭ اۆتوموبيل ونەركاسىبىن دامىتۋعا قوماقتى ۇلەس قوساتىنىنا سەنىمدى. جوبا اياسىندا جاڭا جۇمىس ورىندارىن اشۋ, يمپورتتى الماستىرۋ جانە ەكسپورتتىق الەۋەتتى قامتاماسىز ەتۋ سياقتى ولشەمدەر بويىنشا جۇمىستى ۇيىمداستىرۋ جوسپاردا بار.
جالپى, جوسپار بويىنشا 2022 جىلى ىسكە قوسىلادى دەپ بولجانعان كاسىپورىن ارادا ءۇش جىل وتكەندە ءوزىنىڭ جوبالىق قۋاتتىلىعىنا تولىق قول جەتكىزبەك. ياعني كاسىپورىن جىلىنا جەڭىل كولىكتىڭ 3 ملن شيناسى مەن جۇك كولىگىنىڭ 500 مىڭ شيناسىن وندىرەتىن بولادى. ال جەرگىلىكتى كليماتتىڭ ەرەكشەلىگىنە سايكەس جاسالىناتىن Made in Kazakhstan ماركالى بۇل ونىمدەر ىشكى نارىقپەن قاتار شەتەلدەرگە دە ەكسپورتقا شىعارىلماق.
بولاشاق كاسىپورىننىڭ وبلىس ءۇشىن جاڭا باعىتتى دامىتۋعا مۇمكىندىك بەرەتىن ماڭىزدى جوبا بولعالى تۇرعانى ءسوزسىز. ەڭ باستىسى, زاۋىت ىسكە قوسىلعان كەزدە مىڭنان استام جاڭا جۇمىس ورىندارى اشىلادى. ينۆەستور مەن جەرگىلىكتى اتقارۋشى بيلىك اراسىندا وتكەن كەزدەسۋدە ايتىلعانداي, كاسىپورىندا جەرگىلىكتى ماماندار جۇمىس ىستەيدى. سونداي-اق جاڭا جۇمىس ورىندارىنان ۇمىتتىلەردى تاتارستاندا وقىتىپ الۋ دا دايارلىق باعدارلاماسى بويىنشا قاراستىرىلعان.
جاسىراتىنى جوق, قاراعاندى وبلىسىندا قولعا الىنعان جارقىن جوبانىڭ «وتاندىق ءونىم جوق» دەپ اۋىزدى قۇر شوپپەن ءسۇرتۋدى داعدىعا اينالدىرعان بازبىرەۋلەردىڭ اۋزىنا قۇم قۇياتىن ءتۇرى بار. ءبىر ەسەپتەن مۇنىڭ ءوزى ءىستىڭ قيۋىن تاپسا, يندۋستريا الەۋەتىن ەل ەكونوميكاسىنىڭ يگىلىگى جولىنا جۇمساۋعا بولاتىنىن دالەلدەپ بەردى. سول سەبەپتى دە سارانداعى سەرپىندى جوبالاردىڭ ءوندىرىس نارىعىنىڭ كوگىندە قاناتى تالماي سامعاي بەرسە ەكەن دەپ تىلەيسىڭ.
قاراعاندى وبلىسى