شقو-دا دەمالىس بازاسىنان ءورت شىقتى

شقو توتەنشە جاعدايلار دەپارتامەنتى ءباسپاسوز قىزمەتىنىڭ مالىمەتىنە سۇيەنسەك, بۇگىن تاڭعى ساعات 07.00 شاماسىندا گلۋبوكوە اۋدانىنداعى دەمالىس بازالارىنىڭ بىرىندە ءورت شىققان.

بەلگىلى بولعانداي, تاۋ شاڭعىسى جابدىقتارىن جالعا بەرەتىن عيماراتتىڭ اعاش قۇرىلىمدارى وتقا ورانعان.

«وقيعا ورنىنا ءورت سوندىرۋشىلەر شۇعىل جەتتى. قۇتقارۋشىلار ءتىلسىز جاۋدىڭ كورشىلەس ورنالاسقان باسقا نىساندارعا تارالۋىنا جول بەرمەدى. كوپ ۇزاماي جالپى اۋدانى 140 شارشى مەترگە جەتكەن قىزىل جالىن تولىقتاي اۋىزدىقتالدى. زارداپ شەككەن ەشكىم جوق», دەلىنگەن اقپاراتتا.

ءورتتى سوندىرۋگە جەكە قۇرامنان 16 ادام مەن 4 تەحنيكا جۇمىلدىرىلدى.

وتتىڭ شىعۋ سەبەبى – ەلەكتر جابدىقتارىن مونتاجداۋ جانە پايدالانۋ كەزىندە ءورت قاۋىپسىزدىگى تالاپتارىن ساقتاماۋدان بولۋى مۇمكىن.