جاقىندا عانا IBO تۇجىرىمى بويىنشا جارتىلاي ورتا سالماق دارەجەسىندە الەم چەمپيونى اتاعىنا قول جەتكىزگەن كاسىپقوي بوكسشى دانيار ەلەۋسىنوۆتى 2022 جىلى ۇلكەن جەكپە-جەكتەر كۇتىپ تۇر, دەپ حابارلايدى Egemen.kz.
بۇل تۋرالى وليمپيادا ويىندارىنىڭ چەمپيونى دانيار ەلەۋسىنوۆتىڭ مەنەدجەرى ەلۆيس كرەسپو مالىمدەدى. ول ءوز سوزىندە دانياردىڭ سوڭعى جەكپە-جەگىنە قاتىستى پىكىرىمەن دە ءبولىستى.
«دانيار ەلەۋسىنوۆتىڭ سوڭعى جەكپە-جەگى ماعان ۇنادى. كوڭىلىمنەن شىقتى. ول بارلىق راۋندتا قارسىلاسىنان باسىم ەكەنىن ايقىن كورسەتتى. 12 راۋند جۇدىرىقتاسقانى دۇرىس بولدى دەپ ەسەپتەيمىن. نەگە دەسەڭىز سوڭعى ەكى جىلدا ول رينگتە بار بولعانى 9 راۋند قانا وتكىزدى. دانياردىڭ سول قولىنداعى جاراقاتى جازىلعان سوڭ ءبىز ونى شارشى الاڭعا كوبىرەك شىعارا باستايمىز. ءبىر انىعى 2022 جىلى قازاق بوكسشىسىن ۇلكەن جەكپە-جەكتەر كۇتىپ تۇرعانى ءسوزسىز», دەپ تۇيىندەدى مەنەدجەر ءوز ويىن.