قازاقستان تاۋەلسىزدىگىنىڭ 30 جىلدىعى قارساڭىندا ەلوردالىق تجد اۆتوپاركى جاڭا زاماناۋي ءورت ءسوندىرۋ تەحنيكامەن تولىقتى. بۇل تۋرالى نۇر-سۇلتان قالاسىنىڭ اكىمى التاي كولگىنوۆ Instagram پاراقشاسىندا ءمالىم ەتتى, دەپ حابارلايدى Egemen.kz قالا اكىمدىگىنىڭ رەسمي سايتىنا سىلتەمە جاساپ.
ء«ورت سوندىرۋشىلەردىڭ كاسىبيلىگى مەن ەرلىگىنە ورتكە قارسى تەحنيكالىق جابدىقتالۋ دەڭگەيى دە ساي بولۋى ءتيىس. قر تاۋەلسىزدىك كۇنى قارساڭىندا ەلوردالىق تجد اۆتوپاركى جاڭا زاماناۋي ءورت ءسوندىرۋ تەحنيكاسىمەن تولىقتىرىلدى. 50 ارنايى ماشينا ساتىپ الدىق, ولاردىڭ باسىم بولىگى قولدانىسقا بەرىلدى. ءورت ءسوندىرۋ اۆتوماشينالارى جۇمىسقا قاجەت بارلىق زاتتارمەن جابدىقتالعان, زاماناۋي تەحنيكالىق تالاپتارعا سايكەس كەلەدى.
جەدەل ارەكەت ەتەتىن اۆتوموبيلدەردىڭ اراسىندا 90 مەتر بيىكتە ءورت سوندىرۋگە مۇمكىندىك بەرەتىن ارنايى كوتەرگىش تەحنيكا بار. ارنايى تەحنيكانىڭ بۇل ءتۇرى ەلىمىزدە العاش رەت قولدانىسقا بەرىلمەك. بىلتىر 10 ارنايى ماشينا قولدانىسقا بەرىلسە, بيىل تاعى 50-ءى الىندى. بايقوڭىر اۋدانىندا ءورت ءسوندىرۋ دەپوسىن اشتىق. تاعى 3 ءورت ءسوندىرۋ دەپوسىن سالامىز, ولاردىڭ ەكەۋى ەلدى مەكەندەردە اشىلادى. بۇل ماتەريالدىق-تەحنيكالىق بازانى جاقسارتۋعا جانە قۇتقارۋشىلارعا جۇمىس ىستەۋ ءۇشىن قولايلى جاعداي جاساۋعا مۇمكىندىك بەرەدى.
تۇرعىن ءۇي جاعدايىن جاقسارتۋ ءۇشىن قازاقستاندىق تۇرعىن ءۇي باعدارلاماسىنا قاتىسۋشىلاردىڭ ساناتى كەڭەيتىلدى, وعان تجد قىزمەتكەرلەرى دە كىردى. سونىمەن قاتار, «ەلوردا جاستارى» ارنايى تۇرعىن ءۇي باعدارلاماسى بويىنشا تۇرعىن ءۇي بولەمىز.
جىل باسىنان بەرى ءبىزدىڭ قۇتقارۋشىلار 400-گە جۋىق ادامدى قۇتقاردى! ۇزدىك قىزمەتكەرلەرگە «قازاقستان رەسپۋبليكاسى تاۋەلسىزدىگىنە 30 جىل» مەرەكەلىك مەدالدارى بەرىلدى. توتەنشە جاعدايلار دەپارتامەنتىنىڭ قىزمەتكەرلەرىنە قاجىرلى ەڭبەگى مەن جۇمىسىنا ادالدىعى ءۇشىن العىس ايتامىن!» دەپ جازدى ەلوردا اكىمى.