ەل تاۋەلسىزدىگىنىڭ 30 جىلدىعىنا وراي قر اقپارات جانە قوعامدىق دامۋ مينيسترلىگىنىڭ قولداۋىمەن «قازاقستان» تەلەراديوكورپوراتسياسىنىڭ مادەني مۇرانى تسيفرلاندىرۋ باعىتىنداعى بىرەگەي جوباسى altynqor.com مەديا پورتالى ىسكە قوسىلدى, دەپ حابارلايدى Egemen.kz.
سايتتا قازاق تەلەۆيزياسى التىن قورىنداعى 1930 جىلداردان بەرگى ۆيدەو جانە اۋديوماتەريالدار, سونداي-اق تاۋەلسىزدىك جولىنداعى ايتۋلى تاريحي وقيعالار توپتاستىرىلعان.
مەديا پورتال «بەينەقور», «اۋديوقور», «تۇلعالار» جانە «فوتو ارحيۆ» بولىمدەرىنەن تۇرادى. ءار بولىمدە تەلەۆيزيا جانە راديو ارداگەرلەرىنىڭ, قازاق ادەبيەتى مەن مادەنيەتى قايراتكەرلەرىنىڭ سۇحباتتارى, ەستەلىكتەرى, جەكە ءارحيۆى توپتاستىرىلدى.
ەلباسى نۇرسۇلتان نازارباەۆتىڭ «رۋحاني جاڭعىرۋ» باستاماسىن جۇزەگە اسىرۋ ماقساتىندا سايتقا باتىرلار جىرىنىڭ 50 نۇسقاسى, 100 كۇي, 100 ەرتەگى, سىڭسۋ جانە وزگە داستۇرلەرىمىز تۋرالى اقپاراتتار ەنگىزىلگەن.
«بەينەقور» بولىمىندە س.اشىمباەۆ, ش.مۇرتازا, س. ورازالين جۇرگىزگەن «پارىز بەن قارىز», «ۇلت جانە سانا», «سۇحبات» باعدارلامالارىمەن قاتار, ءار جىلدارداعى «تاماشا», «حالىق قازىناسى», «اسىل مۇرا», «ادام ىزدەپ ءجۇرمىن», «كەلەسى ايالداما», «كەش جارىق», «كۇلتوبە» سىندى 800-دەن استام بولىمنەن تۇراتىن 50 تەلەحابارلار تسيكلى, «سوۆەتتىك قازاقستان» كينوجۋرنالى مەن «قازاقتەلەفيلم» وندىرىستىك بىرلەستىگىنىڭ جوبالارى بار.
«تۇلعالار» بولىمىندە ك. ازىرباەۆ, م. اۋەزوۆ, س.مۇقانوۆ, ع. مۇسىرەپوۆ, ع. مۇستافين, ءا. تاجىباەۆ, ش. جيەنقۇلوۆا, ك. بايسەيىتوۆا, ش. ايمانوۆ, ش. ايتماتوۆ, ق. مىرزا ءالى سىندى تۇلعالاردىڭ قاتىسۋىمەن ءار جىلدارى تۇسىرىلگەن بەينەتوپتامالار قامتىلدى
«اۋديوقور» بولىمىنە 1954 جىلدان بەرى ساقتالعان م.اۋەزوۆ, س.مۇقانوۆ, ءى.ەسەنبەرلين, ب.سوقپاقباەۆ, ع.مۇسىرەپوۆ سىندى 100 ۇلت قايراتكەرىنىڭ ءار جىلدارى جازىلىپ الىنعان داۋىستارى بار.
بۇگىندە «التىن قوردا» 110 مىڭنان استام بەينە جانە اۋديوماتەريال بولسا, ونىڭ قاتارى جىل سايىن 1000 ماتەريالمەن تولىقتىرىلىپ وتىرادى.