الماتى قالالىق پوليتسيا وكىلدەرى الەۋمەتتىك جەلى ارقىلى نەسيە راقىمشىلىعى جاسالادى دەگەن جالعان اقپارات تاراتقانداردى ىزدەپ جاتىر, دەپ حابارلايدى Egemen.kz.
الماتى قالالىق پوليتسيا دەپارتامەنتى, قر قارجى نارىعىن رەتتەۋ جانە دامىتۋ اگەنتتىگىنەن تۇرعىندار اراسىندا نەسيەگە راقىمشىلىق جاساۋ جانە نەسيەنى ەسەپتەن شىعارۋ تۋرالى شىندىققا جاناسپايتىن اقپاراتتىڭ تارالۋ فاكتىسى بويىنشا ارىز كەلىپ تۇسكەنىن ءمالىم ەتتى.
«قازىرگى ۋاقىتتا قالالىق پد تەرگەۋ باسقارماسى جالعان اقپارات تاراتۋ بويىنشا قر قك-ءنىڭ 274-بابى 1-بولىگىندە كوزدەلگەن قىلمىستىق قۇقىق بۇزۋشىلىق بەلگىلەرى بويىنشا سوتقا دەيىنگى تەرگەۋ امالدارىن باستادى. كىنالىلەر جاساعان ءىس-ارەكەتتەرى ءۇشىن قىلمىستىق جاۋاپقا تارتىلادى», دەپ حابارلادى الماتى قالالىق پوليتسيا دەپارتامەنتىنىڭ ءباسپاسوز قىزمەتى.
سونىمەن قاتار الماتى پوليتسياسى ازاماتتاردى جالعان حابارلامالارعا سەنبەۋگە جانە تەك رەسمي اقپاراتتى باسشىلىققا الۋعا شاقىرادى.