ماگيستراتۋراعا ءبىلىم بەرۋ گرانتتارىن تاعايىنداۋ كونكۋرسىنا قاتىسۋ ءۇشىن قۇجاتتاردى قابىلداۋ 10 جەلتوقساندا باستالىپ, 14 جەلتوقسانعا دەيىن جالعاسادى, دەپ حابارلايدى Egemen.kz.
وتىنىمدەر جوعارى وقۋ ورىندارىنىڭ ۆيرتۋالدى قابىلداۋ كوميسسيالارى ارقىلى قابىلدانادى.
ەستەرىڭىزگە سالا كەتەيىك, بۇعان دەيىن ءبىلىم جانە عىلىم مينيسترلىگى ەندى ۇمىتكەرلەر جىلىنا ەكى رەت ماگيستراتۋرا مەن دوكتورانتۋراعا قۇجاتتار تاپسىرا الادى دەگەن شەشىم قابىلداعان بولاتىن.
«وسىلايشا, قانداي دا ءبىر سەبەپتەرگە بايلانىستى العاشقى قابىلداۋ ناۋقانىندا ءوتىنىش بەرۋگە مۇمكىندىگى بولماعان قازاقستاندىقتار كەشەندى تەستىلەۋ تاپسىرۋعا جانە ماگيستراتۋراعا تۇسۋگە تاعى ءبىر مۇمكىندىك الدى. تەستتى ءساتتى تاپسىرعان ۇمىتكەرلەر جازعى قابىلداۋ ناتيجەلەرى بويىنشا تاعايىندالماعان گرانتتاردى جەڭىپ الا الادى.
ەستەرىڭىزگە سالا كەتەيىن, ماگيستراتۋرادا وقۋعا ارنالعان ءبىلىم بەرۋ گرانتتارى كەشەندى تەستىلەۋ ناتيجەلەرىنە سايكەس كونكۋرستىق نەگىزدە بەرىلەدى», دەپ اتاپ ءوتتى قر بعم جوعارى جانە جوعارى وقۋ ورنىنان كەيىنگى ءبىلىم دەپارتامەنتىنىڭ ديرەكتورى ادىلەت تويباەۆ.
مەملەكەتتىك ءبىلىم بەرۋ تاپسىرىسى بويىنشا جانە اقىلى نەگىزدە عىلىمي-پەداگوگيكالىق ماگيستراتۋراعا ءتۇسۋ ءۇشىن شەكتى بالل – 75, بەيىندى ماگيستراتۋراعا ءتۇسۋ ءۇشىن 50 بالدى قۇرايدى. قۇجاتتاردى تاپسىرۋ كەزىندە وقۋعا تۇسۋشىلەر ءبىلىم بەرۋ باعدارلامالارىنىڭ ءبىر توبىن جانە ءۇش جوعارى وقۋ ورنىن كورسەتەدى.
ماگيستراتۋراعا ءبىلىم بەرۋ گرانتىن تاعايىنداۋ كونكۋرسى بيىل 15-22 جەلتوقسان ارالىعىندا, وقۋعا قابىلداۋ 2021 جىلعى 26 جەلتوقسان مەن 2022 جىلعى 10 قاڭتار ارالىعىندا وتەدى. ەستەرىڭىزگە سالا كەتەيىك, ماگيستراتۋراعا تۇسۋشىلەر ءۇش مىڭنان استام مەملەكەتتىك ءبىلىم گرانتىنا ۇمىتكەر بولا الادى.
گرانتتاردىڭ باسىم بولىگى «حيميا» (172 گرانت), «ۆەتەريناريا» (169), «مەحانيكا جانە مەتالل وڭدەۋ» (156), «مەتاللۋرگيالىق ينجەنەريا» (137), «قۇرىلىس ماتەريالدارىن, بۇيىمدارى مەن كونسترۋكتسيالارىن ءوندىرۋ» (132), «ماتەريالتانۋ جانە جاڭا ماتەريالدار تەحنولوگياسى» (130) جانە باسقا ماماندىقتار بويىنشا ءبولىندى.
ءبىلىم بەرۋ باعدارلامالارىنىڭ توپتارى بولىنىسىندە ءبىلىم بەرۋ گرانتتارىنىڭ سانى تۋرالى تولىق اقپارات ۇلتتىق تەستىلەۋ ورتالىعىنىڭ سايتىندا ورنالاستىرىلعان ماگيستراتۋراعا گرانت يەگەرلەرىنىڭ ءتىزىمى ۇلتتىق تەستىلەۋ ورتالىعىنىڭ سايتىندا, سونداي-اق قر ءبىلىم جانە عىلىم مينيسترلىگىنىڭ الەۋمەتتىك جەلىلەردە جاريالانادى.