پاۆلودار وبلىستىق دەنساۋلىق ساقتاۋ باسقارماسى وڭىردە قاراشانىڭ سوڭىندا ەپيدەميالىق احۋال وڭالىپ, ىندەت جۇقتىرۋشىلار سانى ازايۋى مۇمكىن ەكەنىن, بىراق ءىس جۇزىندە جاعداي باسقاشا بولۋىنا دا كۇمان تۋدىرمايتىنىن ايتقان-دى. قازىر ءوڭىر «سارى ايماققا» ءوتىپ, ەپيدەميالىق احۋال بىرتىندەپ تۇراقتالىپ كەلەدى.
وڭىردە «قىزىل ايماقتاعى» 5 ايلىق قاتاڭ شەكتەۋ شارالارى ەندى «سارى ايماققا» دا ءوتىپ, قولدانىستاعى كارانتين شارالارىن ساقتاۋ جانە ونىڭ ساقتالۋىنا باقىلاۋدى كۇشەيتۋ جۇمىستارى باستالدى. وبلىستىق ەپيدەميالىق-سانيتارلىق باقىلاۋ دەپارتامەنتىنىڭ مالىمەتىنشە, وسى ۋاقىتقا دەيىن جالپى ىندەت جۇقتىرعان 44 254 ناۋقاس تىركەلسە, 41 173-ءى ىندەتتەن جازىلىپ شىققان. ال قاراشا ايىنىڭ سوڭىندا «سارى ايماققا» ءوتۋدىڭ ءبىر سەبەبى, وڭىردە ۆاكتسينالاۋ بەلسەندى جالعاسۋدا جانە Ashyq قوسىمشاسىن قولدانۋ قاتاڭ تۇردە تالاپ ەتىلۋدە. سوندىقتان جەدەل شارالار ناتيجەسىن بەرۋگە ءتيىس ەدى. سونىمەن بىرگە وبلىستا ىندەتتەن كوز جۇمعاندار سانى ازايىپ, قىركۇيەك ايىندا – 98 ادام, قازان ايىندا 62 ادام قايتىس بولعان. ولاردىڭ كوبىندە باسقا دا اۋرۋلارى بولعانى انىقتالدى. مىسالى, قازان ايىندا اۋرۋحانادا ىندەت جۇقتىرعان 1 193 ادام ەم قابىلدادى. ينفەكتسيالىق ورىنداردىڭ جۇكتەمەسى 52,4 پايىز بولدى. وڭىردە ينفەكتسيالىق ورىندارعا ناۋقاستاردىڭ ءتۇسۋىنىڭ ازايۋىنا بايلانىستى قوسىمشا اشىلعان ورىندار قىسقارتىلۋدا. قازىر بارلىق اۋداندىق اۋرۋحانالارداعى جانە وبلىس ورتالىعىنداعى ينفەكتسيالىق بولىمدەر جابىلدى.
جالپى, باسقارمانىڭ مالىمەتى بويىنشا 14 قاراشادا اۋرۋعا شالدىققاندار سانى 100-دەن اسقان بولاتىن. ودان كەيىن اپتا بويى ىندەت جۇقتىرعانداردىڭ سانى كۇن سايىن ازايدى. ەمحاناعا تۇسكەن ناۋقاستارعا قاجەتتى وتتەگى قۇرىلعىلارى جەتكىلىكتى, مەديتسينالىق پەرسونالدىڭ قاجەتتى مولشەرى بار. ەمحانالاردىڭ جانىندا 166 ءموبيلدى بريگادا, ال پتر دياگنوستيكاسىن جۇرگىزۋگە ارنالعان 7 زەرتحانا جۇمىس ىستەۋدە. تاۋلىگىنە ورتا ەسەپپەن 2 300 پتر قورىتىندىسى شىعارىلادى.
ەلىمىزدە ىندەتكە قارسى رەۆاكتسينالاۋ باستالعانى بەلگىلى. بۇل دەگەنىمىز – ەكپەنى ەكى رەت قابىلداعان ادامدار 6-9 اي وتكەن سوڭ ەكپەنى قايتا الادى دەگەن ءسوز. وبلىستا بۇگىندە 35 ادام ەكپەنى قايتا سالدىرعان. دەنساۋلىق ساقتاۋ باسقارماسىنىڭ مالىمەتىنشە, قازىر مەديتسينا قىزمەتكەرلەرى, دارىگەرلەر دە رەۆاكتسينالاۋعا قاتىسۋدا. ال رەۆاكتسينالاۋعا بيىل اقپان ايى مەن ناۋرىزدا ەكپە العان ادامدار قاتىسا الادى. جىل سوڭىنا دەيىن 60 جاستان اسقان ادامدار دا ەكپەنى قايتا قابىلدايدى. بۇل ءۇشىن eGov ەلەكتروندى پورتالى ارقىلى كەزەككە جازىلادى.
– CoronaVac, Hayat-Vax, QazCovid-in ەكپەسىن العاندار رەۆاكتسينالاۋ كەزىندە سپۋتنيك V نەمەسە Pfizer ۆاكتسيناسىن سالدىرا الادى. ال Pfizer-ءدى سالدىرعاندار سپۋتنيك V, CoronaVac, Hayat-Vax, QazCovid-in پرەپاراتتارىن قابىلدايدى. رەسەيلىك ەكپەنى العاندار دا قايتا ۆاكتسينالاۋ كەزىندە ۆاكتسينانىڭ 4 ءتۇرىن تاڭداي الادى, – دەيدى باسقارما وكىلدەرى.
رەۆاكتسينالاۋعا قاتىسقانداردىڭ مالىمەتى ەلەكتروندى قۇجاتتا بەلگىلەنبەك. قازىرگى ۋاقىتتا وبلىستا ەكى رەت ەكپە العاندار سانى 309 مىڭعا جەتكەن.
وبلىستىق سانيتارلىق-ەپيدەميالىق باقىلاۋ دەپارتامەنتىنىڭ مالىمەتىنشە, وتكەن اپتانىڭ سوڭىندا وڭىرگە Pfizer ۆاكتسيناسى جەتكىزىلگەن. Pfizer ەكپەسىن الۋدا وبلىس ورتالىعى, ەكىباستۇز قالاسى مەن ەرتىس, باياناۋىل اۋداندارىنىڭ تۇرعىندارى بەلسەندىلىك كورسەتۋدە. وبلىستىق دەنساۋلىق ساقتاۋ باسقارماسىنىڭ باسشىسى ايدار سەيىتقازينوۆ تا ەكپەنى قايتا سالدىردى.
– رەۆاكتسينالاۋ قازىر ەمحانالاردا جۇرگىزىلۋدە. بۇعان دەيىن سپۋتنيك V ۆاكتسيناسىن سالدىرعاندار 9 ايدان كەيىن قايتا ەكپە سالدىرادى, QazVac پرەپاراتىن قابىلداعاندار اراعا 6 اي سالىپ رەۆاكتسينالاۋعا قاتىسادى, – دەيدى باسقارما باسشىسى.
جالپى, وبلىستا ىندەتكە قارسى ەكپەنىڭ العاشقى داناسىن 339 مىڭعا جۋىق ادام سالدىرسا, ەكىنشى كومپونەنتتى 312 مىڭنان استام ادام الدى.
وبلىس ورتالىعىندا كارانتين تالابىن بۇزعان بيزنەس نىساندارى دا انىقتالدى. قالالىق اكىمدىكتىڭ ءباسپاسوز قىزمەتىنىڭ مالىمەتىنشە, مونيتورينگ بارىسىندا 26-29 قاراشا ارالىعىندا 62 شاعىن جانە ورتا بيزنەس نىسانىندا تەكسەرىس جۇرگىزىلىپ, كارانتين ءتارتىبىن بۇزعان 26 نىسان انىقتالعان. كوبىنەسە بيزنەس نىساندارىندا كەلۋشىلەر مەن قىزمەتكەرلەردىڭ بەتپەردە تاقپاۋى, رۇقسات ەتىلگەن ۋاقىتتان تىس مەرزىمدە جۇمىس ىستەۋى انىقتالعان. كارانتين تالاپتارىن بۇزعان نىساندار قاتارىندا Beerlandia, Alpenhof, TUYA مەيرامحانالارى, «بارىس», «ارتۋر», «كۆازار», Atrium, «ميراس», «گۋلليۆەر», «تۇلپار» ساۋدا ۇيلەرى مەن Egle اياق كيىم سالونى جانە مير كوشەسى 52 مەكەنجايى بويىنشا كوتەرمە ساۋدا دۇكەنى, Eco bazaar بازارى, Garage گاسترو بارى, LA casa de papel بار. بارلىق انىقتالعان فاكتىلەر بويىنشا شارالار قابىلدانىپ, ماتەريالدار شەشىم قابىلداۋ ءۇشىن سانيتارلىق-ەپيدەميالىق باقىلاۋ باسقارماسىنا جىبەرىلدى.
پاۆلودار وبلىسى