الماتى كوشەلەرىنىڭ بىرىندە جاياۋ جۇرگىنشىنى اۆتوبۋس قاعىپ كەتتى, دەپ حابارلايدى Egemen.kz.
الماتى قالالىق پوليتسيا دەپارتامەنتىنىڭ مالىمەتىنشە, جول-كولىك اپاتى 27 قاراشادا شامامەن كەشكى ساعات 20:20-دا بولدى.
Yutong ماركالى اۆتوبۋسىنىڭ جۇرگىزۋشىسى جۇماباەۆ كوشەسىمەن شىعىس باعىتتا ءجۇرىپ بارا جاتىپ, جانسۇگىروۆ كوشەسىنىڭ شىعىسىنا قاراي جۇماباەۆ كوشەسىندە جولدىڭ جۇرۋگە بولمايتىن بولىگىنەن ءوتىپ بارا جاتقان جاياۋ جۇرگىنشىنى قاعىپ كەتتى.
«جول-كولىك وقيعاسى سالدارىنان 40-45 جاس ارالىعىنداعى بەلگىسىز جاياۋ جۇرگىنشى وقيعا ورنىندا كوز جۇمدى. اتالعان دەرەك قر قك 345-بابى 3-بولىگى بويىنشا سوتالدى تەرگەپ-تەكسەرۋدىڭ بىرىڭعاي تىزىلىمىندە تىركەلدى. ساراپتاما تاعايىندالدى», دەدى الماتى قالالىق پد انىقتاۋ باسقارماسى باسشىسىنىڭ ورىنباسارى سالتانات حيشانلو.