قازاقستان-رەسەي شەكاراسىنداعى وتكىزۋ پۋنكتتەرىنىڭ مارتەبەسى وزگەرەدى

«2019 جىلعى 7 قاراشادا ومبى قالاسىندا وتكەن قازاقستان مەن رەسەيدىڭ XVI وڭىرارالىق ىنتىماقتاستىق فورۋمى اياسىندا قر يندۋستريا جانە ينفراقۇرىلىمدىق دامۋ مينيسترلىگى مەن رەسەي فەدەراتسياسىنىڭ كولىك مينيسترلىگى اراسىندا قازاقستان-رەسەي شەكاراسىنداعى وتكىزۋ پۋنكتتەرىنىڭ جۇمىس ىستەۋى جونىندەگى بىرلەسكەن ءىس-قيمىل باعدارلاماسىنا قول قويىلدى», دەپ حابارلادى اسقار مامين ءوز جاۋابىندا.

ونىڭ ايتۋىنشا, باعدارلامادا قازاقستان-رەسەي شەكاراسىنا ءوتۋدىڭ 5 جەڭىلدەتىلگەن پۋنكتىنىڭ مارتەبەسىن وزگەرتۋ قاجەتتىلىگى تۋرالى ماسەلەنى پىسىقتاۋ بويىنشا ءىس-شارالار كوزدەلگەن (كازتالوۆكا (بقو) – فومين (ساراتوۆ وبلىسى), مولودوست (بقو) – جوعارعى باسقۇنشاق (استراحان وبلىسى), بالقۇدىق (اتىراۋ وبلىسى) - حارابالي (استراحان وبلىسى), جيرەنقوپا (اقتوبە وبلىسى) - پەرۆوماي (ورىنبور وبلىسى), ايتەكە بي (اقتوبە وبلىسى) – سويۋزنوە (ورىنبور وبلىسى).

«وسىعان بايلانىستى قازاقستان - رەسەي جۇمىس توبى قۇرىلدى, ولار اتالعان جەڭىلدەتىلگەن 5 ءوتۋ پۋنكتى بويىنشا بىرلەسكەن كوشپەلى تەكسەرۋلەر جۇرگىزدى, قورىتىندىسى بويىنشا ەكى ەلدىڭ كولىك ۆەدومستۆولارى مينيسترلەرىنىڭ ورىنباسارلارىنىڭ باسشىلىعىمەن بەينەكونفەرەنتسيا وتكىزىلدى», دەپ اتاپ ءوتتى پرەمەر-مينيستر.

بەينەكونفەرەنتسيا بارىسىندا رەسەي تاراپى 5 جەڭىلدەتىلگەن وتكىزۋ پۋنكتىنىڭ مارتەبەسىن ەكى جاقتى وتكىزۋ پۋنكتتەرىنە كەلەسى سەبەپتەر بويىنشا اۋىستىرۋدىڭ ورىنسىزدىعى تۋرالى حابارلادى:

قارقىندىلىعى تومەن (تاۋلىگىنە 60 ادامعا دەيىن جانە 30-عا دەيىن جەڭىل اۆتوماشينا وتەدى); وتكىزۋ پۋنكتتەرىنە قويىلاتىن تالاپتارعا سايكەس كەلتىرۋ ءۇشىن قوسىمشا قارجى قاراجاتى قاجەت; ەكى ەل اراسىندا 2025 جىلعا دەيىن جاڭعىرتۋدى تالاپ ەتەتىن باسىم 25 وتكىزۋ پۋنكتى بار; رف شەكارالاس وبلىستارىنىڭ اكىمشىلەرى قولداۋ كورسەتپەيدى.

«سونىمەن قاتار, 2020 جىلعى 24 قاراشاداعى قازاقستان رەسپۋبليكاسى مەن رەسەي فەدەراتسياسى اراسىنداعى ىنتىماقتاستىق جونىندەگى ۇكىمەتارالىق كوميسسيا وتىرىسىنىڭ 22 - حاتتاماسىنا سايكەس تاراپتارعا «جانىبەك» - «ۆينەۆكا» جانە «وردا» - «پولىننىي» وتكىزۋ پۋنكتتەرىنىڭ مارتەبەسىن «ەكىجاقتى» - «كوپجاقتى» ەتىپ وزگەرتۋ ماسەلەسىن پىسىقتاۋ تاپسىرىلدى.

بۇل رەتتە, ءتىرى جانۋارلاردى باتىس قازاقستان وبلىسىنىڭ اۋىل شارۋاشىلىعى اۋداندارىنا جەتكىزۋدى جەڭىلدەتۋ ماقساتىندا رەسەي تاراپىنا «جانىبەك» - «ۆيشنەۆكا» جانە «وردا» – «پولىننىي» وتكىزۋ پۋنكتتەرىنىڭ مارتەبەسىن وزگەرتۋ جونىندە سۇراۋ جىبەرىلدى, ولاردى جاڭعىرتۋ قازاقستان – رەسەي مەملەكەتتىك شەكاراسى ارقىلى وتكىزۋ پۋنكتتەرىن دامىتۋ جونىندەگى ءىس-شارالار جوسپارىنىڭ شەڭبەرىندە 2020 – 2025 جىلدار كەزەڭىنە (تيىسىنشە 2023 – 2024 جج.جانە 2024 – 2025 جج.) كوزدەلگەن», دەپ تۇيىندەدى ا. مامين.

تاراپتار اتالعان جوسپارعا 2021 جىلدىڭ سوڭىنا دەيىن قول قويادى دەپ كۇتىلۋدە. جوعارىدا اتالعان تارماقتاردىڭ مارتەبەسىن رەسەي تاراپىمەن وزگەرتۋ جونىندەگى جۇمىس جالعاسۋدا.