ۇكىمەت باسشىسى اسقار مامين ەلىمىزدە جەرگىلىكتى قامتۋ جۇمىسىن كۇشەيتىپ, ونىڭ قىزمەتىنە بيزنەس وكىلدەرىن كەڭىنەن تارتۋدى تاپسىردى, دەپ حابارلايدى Egemen.kz.
«جەرگىلىكتى قامتۋدى دامىتۋ اكىمدەردىڭ نەگىزگى مىندەتتەرىنىڭ ءبىرى ەكەنىن تاعى دا اتاپ وتكىم كەلەدى, ولاردىڭ جۇمىسى وسى مىندەت بويىنشا باعالانادى. وسىعان بايلانىستى مىنالارعا نازار اۋدارعىم كەلەدى. بىرىنشىدەن, اكىمدىكتەر جەرگىلىكتى قامتۋدى باقىلاۋ جونىندەگى وڭىرلىك كوميسسيالاردىڭ جۇمىسىن كۇشەيتىپ, ونىڭ قىزمەتىنە جەرگىلىكتى بيزنەستى بارىنشا تارتۋى كەرەك. ەكىنشىدەن, جەر قويناۋىن پايدالانۋشىلاردىڭ ساتىپ الۋى – بۇل دا وتاندىق وندىرۋشىلەردى دامىتۋ مەن قولداۋ ءۇشىن الەۋەتى زور ءىرى الاڭ», دەدى اسقار مامين ۇكىمەت وتىرىسىندا.
سونداي-اق, پرەمەر-مينيستر جەرگىلىكتى قامتۋدى دامىتۋعا قاتىستى مينيسترلەر مەن قۇزىرلى ۆەدومستۆو باسشىلارىنا دا بىرقاتار مىندەت جۇكتەدى.
«يندۋستريا جانە ينفراقۇرىلىمدىق دامۋ, ەنەرگەتيكا مينيسترلىكتەرىنە, «سامۇرىق-قازىنا» قورىنا جەر قويناۋىن پايدالانۋشىلارمەن ەرىكتى كەلىسىمدەر جاساسۋدى قامتاماسىز ەتۋدى تاپسىرامىن. ۇشىنشىدەن, يندۋستريا جانە ينفراقۇرىلىمدىق دامۋ مينيسترلىگى ەنەرگەتيكا مينيسترلىگىمەن, ۇلتتىق كاسىپكەرلەر پالاتاسىمەن بىرلەسىپ, جەر قويناۋىن پايدالانۋشىلاردىڭ وتاندىق تاۋار وندىرۋشىلەرمەن وففتەيك-شارتتار جاساسۋىنىڭ بارلىق قاجەتتى ماسەلەلەرىن پىسىقتاۋدى تاپسىرامىن», دەيدى ول.
اتالعان جۇمىستىڭ ىسكە اسۋىنا ۇكىمەت باسشىسىنىڭ ورىنباسارى رومان سكليار جاۋاپتى بولادى.