ەكىنشى ورتا سالماق دارەجەسىندەگى الەمنىڭ ءابسوليۋتتى چەمپيونى, مەكسيكالىق كاسىپقوي بوكسشى ساۋل الۆارەس ءوز ەلىندە وتكەن بۇكىلالەمدىك بوكس كەڭەسىنىڭ كونۆەنتسياسىندا گەننادي گولوۆكينمەن ءۇشىنشى رەت رينگكە شىعاتىنىن ايتتى, دەپ حابارلايدى Egemen.kz Sports.kz-كە سىلتەمە جاساپ.
بىرەر كۇن بۇرىن مەكسيكالىق بوكسشىنىڭ باپكەرى ەددي رەينوسو شاكىرتىنىڭ گولوۆكينگە قارسى تريلوگياسى مەكسيكا جەرىندە وتكەنىن قالايتىنىن ايتقان بولاتىن. بۇل اڭگىمە «كانەلونى» بەيجاي قالدىرعان جوق.
«ەگەر ەددي سولاي ايتقان بولسا, مەن ونىڭ سوزىنە قارسى شىعا المايمىن. ءۇشىنشى جەكپە-جەكتى وتكىزۋگە, گەننادي گولوۆكينمەن جۇدىرىقتاسۋعا دايىنمىن!», دەدى ساۋل الۆارەس جۋرناليستەردىڭ ءبىرى قويعان ساۋالعا جاۋاپ بەرىپ.