تۇركىستان وبلىسى پد ەكسترەميزمگە قارسى ءىس-قيمىل باسقارماسىنىڭ قىزمەتكەرلەرى ءدىني-ەكسترەميستىك باعىتتاعى ماتەريالداردى ينتەرنەتتە تاراتۋ دەرەگىن انىقتاپ, جولىن كەستى. بۇل تۋرالى وبلىستىق پوليتسيا دەپارتامەنتى باستىعىنىڭ ورىنباسارى, پوليتسيا پودپولكوۆنيگى قۇرمانبەك ساحوۆ ايتتى, دەپ حابارلايدى Egemen.kz.
«الەۋمەتتىك جەلىلەرگە مونيتورينگ جۇرگىزۋ كەزىندە Facebook پاراقشالارىنىڭ بىرىنەن بەلگىسىز ادامداردىڭ تىيىم سالىنعان ءدىني-ەكسترەميستىك ۇيىمنىڭ يدەولوگياسىن ناسيحاتتايتىن بەينەروليكتەر مەن ماتىندىك حابارلامالار جاريالاعانىن انىقتادى. اتالعان ماتەريالدار دەپارتامەنتتە تىركەلىپ, ساراپتاماعا جولداندى. ناتيجەسىندە ساراپشىلار بۇل ماتەريالداردا تەرروريزم مەن ەكسترەميزمدى ناسيحاتتاۋدىڭ بەلگىلەرى بار ەكەنىن راستادى. وسىعان بايلانىستى ءبىز قر قك 256-بابى 2-بولىگىمەن سوتقا دەيىنگى تەرگەۋدى باستادىق. تەكسەرۋ اياسىندا تۇركىستان وبلىسى پد ەكسترەميزمگە قارسى ءىس-قيمىل باسقارماسىنىڭ جەدەل ۋاكىلدەرى مەن تۇركىستان وبلىسى بويىنشا ۇقكد بىرلەسىپ, جەدەل-ىزدەستىرۋ ءىس-شارالارى ناتيجەسىندە كۇدىكتى رەتىندە ارىس اۋدانىنىڭ تۇرعىنىن ۇستادىق. ۇستالعان ەر ادامنىڭ بۇرىن دەسترۋكتيۆتى-ءدىني اعىمنىڭ جاقتاۋشىسى جانە سوتتى بولعانىن انىقتادىق. ونىڭ ءۇيىن ءتىنتۋ كەزىندە ءبىز ءارتۇرلى كومپيۋتەرلىك تەحنيكانى, تىيىم سالىنعان ءدىني ادەبيەتتەر, ۇيالى تەلەفون مەن ديسكىلەردى تاركىلەدىك. قازىرگى ۋاقىتتا سوتقا دەيىنگى تەرگەۋ امالدارى جۇرگىزىلۋدە. كۇدىكتى قاماۋعا الىندى. بۇگىندە ءىستىڭ ءمان-جايى جان-جاقتى انىقتالىپ جاتىر», دەپ ءتۇسىندىردى پوليتسيا پودپولكوۆنيگى قۇرمانبەك ساحوۆ.
تۇركىستان وبلىسىنىڭ پوليتسەيلەرى ازاماتتارعا قر زاڭناماسىمەن تىيىم سالىنعان ءدىني-ەكسترەميستىك باعىتتاعى ماتەريالداردى, ونىڭ ىشىندە الەۋمەتتىك جەلىلەردە تاراتقانى ءۇشىن قىلمىستىق جاۋاپكەرشىلىك قاراستىرىلعانىن ەسكەرتەدى.