قر پرەمەر-ءمينيسترى اسقار ءماميننىڭ توراعالىعىمەن وتكەن قۇقىق بۇزۋشىلىقتىڭ الدىن الۋ جونىندەگى ۆەدومستۆوارالىق كوميسسيا (ۆاك) وتىرىسىندا ينتەرنەت-الاياقتىققا قارسى ءىس-قيمىل جانە جول قوزعالىسى قاۋىپسىزدىگىن قامتاماسىز ەتۋ ماسەلەلەرى قارالدى, دەپ حابارلايدى Egemen.kz پرەمەر-ءمينيستردىڭ ءباسپاسوز قىزمەتىنە سىلتەمە جاساپ.
ىشكى ىستەر ءمينيسترى ەرلان تۇرعىمباەۆ, قارجى نارىعىن رەتتەۋ جانە دامىتۋ اگەنتتىگىنىڭ توراعاسى ءمادينا ابىلقاسىموۆا, تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين, يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ, باتىس قازاقستان وبلىسىنىڭ اكىمى عالي ەسقاليەۆ, سولتۇستىك قازاقستان وبلىسىنىڭ اكىمى قۇمار اقساقالوۆ جانە ت. ب. بايانداما جاسادى.
2021 جىلدىڭ 10 ايىندا قازاقستاندا تىركەلگەن ينتەرنەت-الاياقتىق فاكتىلەرىنىڭ سانى 17,8 مىڭدى قۇرادى, بۇل وتكەن جىلدىڭ سايكەس كەزەڭىندەگى كورسەتكىشتەن 2 ەسەگە جۋىق كوپ. ينتەرنەت-الاياقتىق نۇر-سۇلتان جانە الماتى قالالارىندا, قاراعاندى, قوستاناي جانە شىعىس قازاقستان وبلىستارىندا كوبىرەك تىركەلگەن.
كيبەر-الاياقتىقتىڭ كەڭ تارالعان تاسىلدەرى – ينتەرنەت-حابارلاندىرۋلار بويىنشا تاۋار نەمەسە قىزمەت ءۇشىن الدىن الا تولەم نە تولىق تولەم الۋ (8,2 مىڭ فاكتى), ميكروكرەديتتىك ۇيىمداردىڭ سايتتارىندا جالعان ونلاين-قارىز رەسىمدەۋ (2,7 مىڭ), بانكتەردىڭ قاۋىپسىزدىك قىزمەتتەرىنىڭ اتىنان قوڭىراۋ شالۋ ارقىلى بانك شوتتارىنان اقشا ۇرلاۋ (2,3 مىڭ), ءتۇرلى جوبالارعا, ويىندارعا جانە ت. ب. ءتيىمدى اقشا سالۋدى ۇسىنۋ (1,9 مىڭ), جالعان سىلتەمەلەر جىبەرۋ ارقىلى جەكە دەرەكتەردى نەمەسە اقشانى يەلەنۋ (1,3 مىڭ) جانە ت. ب. بۇل رەتتە الاياقتار شىعىس نومىرلەرىن قازاقستاندىق ۇيالى وپەراتورلاردىڭ ابونەنتتىك نومىرلەرىنە اۋىستىرۋ بويىنشا حاكەرلىك باعدارلامالاردى قولدانادى.
ينتەرنەت-الاياقتىقپەن كۇرەسۋ ماقساتىندا ءىىم-ءنىڭ كيبەرقىلمىسقا قارسى ءىس-قيمىل بولىمشەلەرىن كادرلىق جانە تەحنيكالىق قامتاماسىز ەتۋ كۇشەيتىلدى.
قنردا بيىلعى ءساۋىر ايىندا ونلاين ميكروكرەديتتەر بەرۋ كەزىندە قارىز الۋشىلاردى سايكەستەندىرۋدىڭ جاڭا ءتارتىبىن ەنگىزدى. سايكەستەندىرۋ ءۇش ءتاسىلدىڭ بىرىمەن جۇرگىزىلەدى, اتاپ ايتساق: ەتسق ارقىلى, قارىز الۋشىنىڭ بيومەتريالىق پارامەترلەرىنىڭ سايكەستىگىن سالىستىرىپ تەكسەرۋ, جەكە دەرەكتەردى ەكى فاكتورلى تەكسەرۋ جانە ناقتى ۋاقىت رەجيمىندە تۇلعانىڭ بەينەسىن تەكسەرۋ.
2021 جىلدىڭ 10 ايىندا جول قوزعالىسى قاۋىپسىزدىگىن قامتاماسىز ەتۋ اياسىندا جۇرگىزۋشى تارتىبىنە باقىلاۋ كۇشەيتىلدى. ماس كۇيىندە كولىك جۇرگىزگەنى ءۇشىن 20 مىڭعا جۋىق جۇرگىزۋشى ۇستالدى, 5 مىڭ قارسى قوزعالىس جولاعىنا شىعۋ جاعدايىنىڭ جولى كەسىلدى. 24,5 مىڭ جۇرگىزۋشى كولىك باسقارۋ قۇقىعىنان ايىرىلدى, ونىڭ ىشىندە 1,3 مىڭى ءومىر بويى كولىك جۇرگىزە المايدى. 20 مىڭ ەرەجە بۇزۋشى اكىمشىلىك قاماۋعا الىندى. 220,5 مىڭ جاياۋ جۇرگىنشىگە ايىپپۇل سالىندى.