«التىن» القا مەن «كۇمىس» القا بەرۋ ەرەجەسىن قايتا قاراۋ كەرەك. بۇل تۋرالى ۇلتتىق قوعامدىق سەنىم كەڭەسىنىڭ مۇشەسى ۋايس ەرسايىن ۇلى ايتتى, دەپ حابارلايدى Egemen.kz.
«التىن» القا مەن «كۇمىس» القا بەرۋ ەرەجەسىن قايتا قاراۋ كەرەك. سەبەبى بۇل ناگرادانى بەرۋ ءۇشىن جۇمىسقا قابىلدايتىنداي تەكسەرىس وتكىزىلەدى ەكەن. سوتتالماعانى تۋرالى انىقتاما تالاپ ەتىلەدى», دەدى ول ۇلتتىق قوعامدىق سەنىم كەڭەسىنىڭ 6-وتىرىسىندا.
سونىمەن قاتار كەڭەس مۇشەسى پاندەميا كەزىندە مەملەكەتتىك ورگاندار قاشىقتان قىزمەت كورسەتۋگە كوشكەنىمەن ءالى دە قاعازباستىلىق بار ەكەندىگىن ايتادى.
«حالىق جۇمىسقا تۇراردا تاپسىراتىن ناركولوگيالىق جانە پسيحولوگيالىق ديسپانسەردە ەسەپتە تۇرعان جوق دەگەن انىقتامانى ەگوۆتان تەگىن الا الادى. بىراق, ونى قابىلدامايدى. ولار ديسپانسەردىڭ ءمورى باسىلعان انىقتامانى تالاپ ەتەدى. ال ول 5 مىڭ تەڭگە تۇرادى. سونداي-اق ەڭبەك مينيسترلىگىندە تسيفرلىق ينتەگراتسيا ءالسىز قۇرىلعان. ماسەلەن, كوپبالالى وتباسىلارعا تەگىن بەرىلەتىن جولاقى بيلەتتەرىن جۇمىسپەن قامتۋ ءبولىمى بەرەدى. ولار انالاردان كوپبالالى دەگەن انىقتامانى تالاپ ەتەدى. جۇمىسپەن قامتۋ ءبولىمى ەڭبەك مينيسترلىگىنە قارايدى. ولار بازادان ول انانىڭ مارتەبەسىن كورۋى كەرەك, قۇجات سۇراتپاۋى ءتيىس. وكىنىشكە وراي, ءبىر مينيسترلىككە قارايتىن مەكەمەلەر ءوزاراسىندا انىقتاما جيناتىپ, سابىلتىپ قويعان. ياعني, تاعى دا قاعازباستىلىق ورىن الىپ وتىر», دەدى ۋايس ەرسايىن ۇلى.