بۇل تۋرالى مەملەكەت باسشىسى قاسىم-جومارت توقاەۆ ۇلتتىق قوعامدىق سەنىم كەڭەسىنىڭ التىنشى وتىرىسىندا ايتتى, دەپ جازادى Egemen.kz.
«بۇگىنگى وتىرىس ادەتتەگىدەي جەمىستى ءوتىپ جاتىر. بىرقاتار ۇسىنىستار ايتىلدى, ولاردى مۇقيات زەرتتەپ, ءتيىستى بولسا, قاجەتتى شەشىم قابىلدايمىز. ەلىمىز ءبىر ايدان كەيىن تاۋەلسىزدىكتىڭ 30 جىلدىعىن اتاپ وتەدى. بۇل - بۇكىل حالىق ءۇشىن ءمانى بار مەرەيلى بەلەس. سونىمەن قاتار مەملەكەتىمىزدىڭ دامۋ جولىنداعى ماڭىزدى مەجە. وسىعان وراي قوعامدىق ماڭىزى بار ناقتى جۇمىس اتقارىلىپ جاتىر. مەن بۇعان ەرەكشە كوڭىل ءبولىپ وتىرمىن», دەدى توقاەۆ.
پرەزيدەنت جالپى 30 جىل بويى كەزەڭ-كەزەڭمەن جۇزەگە اسىرىلعان رەفورمالار ءومىرىمىزدى تۇبەگەيلى وزگەرتكەنىن ايتتى.
«بۇل باعدارىمىزدىڭ دۇرىس ەكەنىن كورسەتتى. بۇل تاريحي بەلەسكە مىقتى مەملەكەت, ءبىرتۇتاس ۇلت رەتىندە جەتىپ وتىرمىز. بىراق جەتىستىكتەرگە توقمەيىلسىپ توقتاپ قالمايمىز. العا ۇمتىلا بەرەمىز. ساياسي جاڭعىرۋ, ەكونوميكا قۇرىلىمىن وزگەرتۋ, الەۋمەتتىك سالانى دامىتۋ جۇمىستارى تىڭ قارقىنمەن دامىپ جاتىر. بۇعان ۇلتتىق قوعامدىق سەنىم كەڭەسى ۇلەس قوسىپ جاتىر. كەڭەس قۇرىلعاننان باستاپ ءتيىمدى پىكىرتالاس الاڭىنا اينالدى», دەدى مەملەكەت باسشىسى.